LIDALULA OKUBULALA I-CHELSEA ISEKELA LOMQEQESHI
UVEZA okubulala iChelsea uGianfranco Zola ongumsizi womqeqeshi kule kilabhu ezobhekana neManchester United koweFA Cup namuhla ngoMsombuluko ngo-21h30 eStamford Bridge okuyikomkhulu leChelsea.
IChelsea iya kulo mdlalo nje, zisaqaqamba izinhliziyo zabalandeli bayo njengoba inenebulwe yiManchester City ngo-6-0 koweligi emasontweni ambalwa edlule.
UMaurizio Sarri ololonga iChelsea, usematheni njengoba izingqapheli zebhola zithi makakhonjwe indlela zizeseka ngokuthi uyehluleka wukumelana neChelsea. UZola uveza inkinga akholwa wukuthi yiyona ebulala iChelsea.
“Indlela esidlala ngayo kayigculisi neze, into esibulalayo wukuthi abantu bafuna ukuzigqamisa ngabodwana, kabafuni ukudlala njengekilabhu. Ngesikhathi ngisadlala kule kilabhu besibaba ha ngoba besilekelelana umuntu ubengafuni ukuzigqamisa yedwa.
“Kodwa-ke kuzofanele sizame ukubuyisa isithunzi ngalo mdlalo weManchester United. Uzokuba nzima ngoba iyavutha ngaphansi komqeqeshi wayo omusha osiqonda kahle isitayela sale kilabhu. Ngethemba ukuthi sizobathoba amanxeba abalandeli bethu ngaleli hlazo esilithelwe yiCity,” kusho uZola.