LUNGA SOKHELA
NGIFISA ukuqala ngokubongela AmaJita (SA U/20) ngokuqeda elele endaweni yesithathu kwi-U/20 Africa Cup of Nations ebiseNiger. Okungenza ngiziqhenye nakakhulu ngempumelelo yamaJita wukuthi sinabadlali ababili kulesi sikwati, uBayanda Shangase noSibusiso Mabiliso.
USbu uvele ujwayele ukuyiqala imidlalo yekilabhu. Ikilabhu imdedele ngeqholo lokuthi izokwazi ukuyibamba engekho ukuze ayothola lesi sipiliyoni esimqoka. Sethemba ukuthi ukudlala kwi-Afcon kuzobaqinisa ukhakhayi nakakhulu.
Isifiso sami esikhulu ngesokuthi bobabili baqokelwe esikwatini esizodlala kwiNdebe yoMhlaba ka-U/20 ezokuba ngoNhlaba (May) ePoland. Ukudlala ezingeni lomhlaba kuzobavula amehlo ngempilo, kubathuthukise ukuba ngabadlali bezinga eliphezulu.
Sengathi bangabuya bephephile eNiger. Sibonga ethimbeni lethu elivundulula abadlali nabaqeqeshi bezinhlaka ezincane ngokubavundulula. Sijwayele ukugxeka ubuholi beSafa, kodwa ngibethulela isigqoko abaholi bayo ngokungalokhu bephikisana nemibono yethu kepha baphendula ngemisebenzi emihle.
Manje amaqembu esizwe asengenela imiqhudelwano emqoka kanobhutshuzwayo emhlabeni, aphinde adlale ngendlela esinika ugqozi. Sekumele seseke iBafana Bafana embhidlangweni wayo wokungena kwi-Afcon njengoba izobhekana neLibya ngenyanga ezayo ekuhambeni.
Uma iBafana yehlulekile, kufanele sizinuke amakhwapha thina esingabaphathi bamakilabhu ebhola elikhokhelayo kwazise yithina esikhiqizela iBafana abadlali. Kuzomele silwele ukunyusa ibhola esilidlalayo lifane neligijinywa yizingcweti zase-Afrika kulo mdlalo. SILINDELE IZITHELO EZINHLE OHAMBWENI LWASESWAZILAND
Enye yezindawo ezibalulekile esesinobudlelwano obuhle nayo yiSwaziland. Kunomqhudelwano wokuthuthukisa abadlali wakwaBuild-It osusekwe nayiSwazi Federation ukufukula ibhola emazingeni aphansi.
Ithimba lamaZulu lizohambela eSwaziland mhla ka-18 kuya ku-22 kuNdasa (March) ukuyohlangana nezinhlaka ezimqoka zakhona, kubalwa ukuhambela izitolo nososeshini wakhona ukubazisa ngomsebenzi omuhle owenzekayo khona.
Sizokuba nanemidlalo emibili emqoka mhla ka-23 nangomhla ka-24 lapho sizobhekana khona neManzini Wanderers neMbabane Swallows. Sinxenxa bonke abalandeli abaseduzane nale ndawo ukuphuma ngobuningi bazoseseka. Ithimba lethu lezokuxhumana lizonazisa ngokuqhubekayo.
SIZOHAMBELA EZITOLO ZAKWASPAR NGAPHAMBI KOMDLALO NEPIRATES
NgoMgqibelo sizokuba nomdlalo obucayi ne-Orlando Pirates eGoli. Lona wumdlalo wamakilabhu amadala futhi anomlando onothile kwiPSL. Muva nje la makilabhu asevuselele ukuba yizimbangi okwenza kusiphuke izidindi nxa ebhekene. Njengoba sekubhekwe ekusongweni kwesizini, imiphumela yayo yonke imidlalo seyimqoka ngokwedlulele.
Ngaphambi kwalo mdlalo, sizovakashela ezitolo ezimbili ezinkulu zakwaSpar eziseGoli. Uxhaso esiluthola kwaSpar lukhulu ngokubabazekayo okwenza sibe nesibopho sokuhambela lapho kukhona imikhiqizo yabo kulo lonke elakuleli. Simagange ukuhlangana nezisebenzi zakwaSpar nabo bonke abayingxenye yalesi sikhondlakhondla sale nkampani.
Sinethemba lokuthi izisebenza zakwaSpar ngokuhlangana nabalandeli bethu baseGoli bazothutheleka ngezinkani ukuzoseseka sesibhekene nePirates esizimisele ngokuyigijimisa kanzima. Sinxusa abalandeli baKwaZulu-Natal nakwezinye izifundazwe ukuba nabo bazoseseka.
IYANGICIKA INDABA YONDLAVINI BABALANDELI
Ngeledlule ngiphoxeke kakhulu sithukwa yingxenyana yabalandeli emuva komdlalo neCape Town City. Emhlanganweni wethu odlule nganxenxwa ukuba ngilinde izinhlaka zabalandeli kube yizona ezibhekana nezixhwanguxhwangu emidlalweni.
Nakuba seliphelile isonto kwenzeke lesi sigameko kodwa kangikawutholi umbiko ngesinyathelo esithathelwe owesifazane ochapha inhlamba ehlasimulisa umzimba emidlalweni yethu. Okubuhlungu wukuthi usemncane kodwa ukubona kuyinto enhle ukuthuka abantu besilisa abadala kunaye.
Uma ozihlalo bamaziko behluleka ukubhekana nalesi simo, nakimina kunzima ukuluxazulula. Kubukeka ngizophoqeleka ukuqhubeka nokumisa abalandeli abangaziphathi kahle emidlalweni kwazise abakwenzayo kudicilela phansi ikilabhu.
Empeleni kuyangicasula ukuthi ngaso sonke isikhathi kumele ngikhulume into eyodwa kule ngosi. Ngeke ngikuvumele ukuxhashazwa kwabadlali bekilabhu, abaqeqeshi nezikhulu ekubeni bezinikela emsebenzini wabo.
Ngiyacela ozihlalo babalandeli ukuba basilungise ngokukhulu ukushesha lesi simo njengoba kwavunyelwana ngalokho emhlanganweni odlule kwazise inqola seyibukeka seyiphumile impela esipolweni!