IQEDE ISHOBOLO LEMINYAKA I-GOLDEN LIONS

ILIONS okungenye yamaqembu ahlonishwayo ebholeni lombhoxo kuleli iqede ishobolo leminyaka ibuya namaphuzu agcwele okokuqala ngqa e-Argentina.

ILions iguqise iJaguares ngo-25-16 emdlalweni weVodacom Super Rugby ngoMgqibelo kusihlwa ekuhambeni. Bese kuphele iminyaka emithathu leli qembu laseGoli lihluleka wukubuya nomphumela omuhle kuleliya lizwe.

Leli qembu eselifinyelele kathathu kowamanqamu kulandelana, lithwele amathemba eNingizimu Afrika njengoba kuyilona elijwayele ukuhamba ibanga elide kulo mqhudelwano.

Kuzo ezeSuper Rugby, iCell C Sharks iyiqale ngegiya eliphezulu le midlalo ibhudluza iSunwolves yaseJapan ngo-45-10 ekuhambeni. Kuyiwe ekhefini iSharks ihamba phambili ngo-24-10.

Ama-try ezikaRobert du Preez Snr abekwe ngu-Akker van der Merwe amabili, uDan du Preez, uMakazole Mapimpi noJeremy Ward kwathi amanye amaphuzu angezwa nguRobert du Preez Jnr. Emdlalweni olandelayo weSharks, izobhekana neBlues ngoMgqibelo eJohnsson Kings Park Stadium, eThekwini. Blues 22, Crusaders 24; Waratahs 19, Hurricanes 20; Sunwolves 10, Sharks 45; Blue Bulls 40, DHL Stormers 3; Jaguares 16, Lions 25.