IGCOKAMA LIBHOBOKA NGEYASEMABHIDA
KUPHAMBENE ukukhuluma ngezinkulumo ezithi isilomo sikamasikandi, uMthandeni “iGcokama Elisha" Manqele okuthiwa sesizoba yingxenye ye#Gcwalisa iMabhida Masikandi Concert, ehlelwa yiNdlamlenze Development Foundation, kaKhuzani "Ndlamlenze" Mpungose - ezokuba mhla ka-30 kuNdasa (March), eMoses Mabhida Stadium, eThekwini. Engxoxweni yalo
neLANGA, iGcokama liphike lalala ngomhlane ukuthi selivumile ukuthi lizoba yingxenye yalo mcimbi. Lithe kukhulunywa iphutha ngegama lalo. Liveze ukuthi uma "i-ANC" ifuna ukuliqasha kulo mcimbi waseMabhida, izokwenza lokho ngaphandle kokuba kukhulunywe izinto ezingelona iqiniso ngalo.
“UKhongolose uzoxhumana nami uma ungidinga kulo mcimbi wawo. Akekho ngisho noyedwa umuntu oxhumane nami. Mhlawumbe lokhu abakukhulumayo kuyizifiso nje zokuba ngibe khona emcimbini.
"Ngiyezwa nje kuthiwa kunomcimbi, kodwa kazikho izingxoxo esike sazenza nabathile,” kusho iGcokama. Libuza ILANGA ukuthi kungani ethi ulindele ucingo oluvela kuKhongolose, uthe yena wazi ukuthi lo mcimbi ngowe-ANC ngoba yiyona ephambili kuwona.
“Ngiyafisa umcimbi wabo ube yimpumelelo ngoba kangiyena umuntu onenhliziyo embi futhi kangikaze ngiphawule ngisho kabi ngawo. Abantu mabazimele entweni yabo, bangafaki igama lami njengoba nami ngazimela kowami umcimbi ngonyaka odlule,” kusho yena.
Ngokuthola kwaleli phephandaba, bese kuvunyelwene neGcokama ukuthi nalo seliyingxenye yalo mcimbi, kwazise bese kunezinkulumo zokuthi kalifuni ukuzibandakanya nawo njengoba (umcimbi) uhlelwa yinsizwa elingcweka nayo kakhulu, uKhuzani.
Ngakolunye uhlangothi, iNdlamlenze Development Foundation ikhiphe isitatimende esiqinisekisa ukuthi iGcokama lizobe linandisa kulo mcimbi.
Umqondisi wawo, uMnu Mthokozisi Zuma, uthe lo mcimbi ngowokwakha ubumbano kubaculi. “IGcokama Elisha lizoshiyelana inkundla noKhuzani esiteji nabanye abaculi bolunye uhlobo lomculo.
"Siyakuqinisekisa ukuthi uMthandeni uyingxenye yalo mcimbi ngalolu suku,” kusho uMnu Zuma.
Kulo mcimbi kuboshelwe uMfiliseni Magubane, uShwi noMtekhala, iHhashi Elimhlophe, uPhuzekhemisi, Izingane Zoma, Imithente, uThokozani Langa, Amageza Amahle, uMajotha, iMfezemnyama, uJaivazimnike, oSaziwayo, Ama-SAP, uQhosha, uMalahle, uStayela, uNjoko, uMntuyenziwa, uDumakahle, iNkosi Yamagcokama, iThwasa LeNdidane, Ichwane Lebhaca, Nyonemhlophe, Bahubhe, iThwasa Lekhansela, uBuselaphi, uZanefa Ngidi, uBonakele, uFalabo, uMfanie, Amangcukumane, uMnikezwa, uSgabiso, uDulasi, uMabhilidi, uSgwebo Sentambo, uMroza, uMgojeli, uMdumazi, Abafana bakaMgqumeni, uMzukulu, uMzukulu kaSdwedwe nabanye abaniningi.