Kuvuselelwe uthando nakulabo abangashadile
BEZICOBELELANA ngezimfihlo zazo izithandani esezineminyaka zishadile, ngoLwesihlanu ebusuku endaweni yokudla eBukhosini Lounge, eSiphingo.
Lo mcimbi obuhlelwe nguBheki Fakazi, ongumnikazi wendawo, ubugcwele kakhulu abantu abashadile nakuba bebekhona nabangashadile njengoba bekukhulunywa ulimi lothando kuphela.
Asebeshadile bakhulume phambili bedalula izimfihlo zabo ezenze baze babe la bekhona njengamanje. Kulabo asebeshadile, bekukhona ngisho asebeqede iminyaka engaphezulu kwengama-30 beshadile.
Ezintweni abazibekile okuyizona ezikhulisa uthando, bebeqhakambisa inhlonipho kanye nokuvikela isithunzi sothando lwenu emehlweni abantu.
USbo Da Poet ungene kungazelele muntu njengoba abebehambele umcimbi bebenga- mlindele. Akachithanga isikhathi-ke, ufike wagibela phezu kwezinkondlo zakhe zothando.
Ngesikhathi eshaya izinkondlo, ubungafunga ukuthi kukhona intombi ayigudlayo ekhona kulo mcimbi ngoba ubelokhu ewadedele njalo amagama ancoma intokazi ayithandayo ngenkondlo yakhe esihloko sithi: “Nginosukasambe Wentombi”.
UNelly K naye ubengazibekile phansi ngamanoni omculo wothando. UMnu Fakazi obekunguyena obephethe uhlelo aphinde abe ngumgqugquzeli wawo, uthi imicimbi enjengalena bayenzela ukukhombisa abantu ukuthi uthando lusekhona.
“Sifuna ukunciphisa inani lezingane ezingenaye umuntu ozikhulisayo, sifuna imishado iqhubeke ibe miningi,” kusho yena.
Bebekhona nabanye oDJ abebenandisa kanti kulo mcimbi bekuhlotshwe ngezingubo ezinokumhlophe nokubomvu.