Izinselelo kweyesabelomali

"Ukusiza i-Eskom kufana nokuthela imali esisefweni esivuzayo"

ENKULUMWENI yesabelomali echazwe njengenzima ukuzedlula zonke emlandweni waseNingizimu Afrika, uMnu Tito Mboweni ayethule izolo ngoLwesithathu ntambama ephalamende, ukuqedile ukuqagela ngokuthi kuzokwenzekani ngenkampani yakwaEskom ecwile ezikweletini nasekuphathweni budlabha okuhambisana nenkohlakalo.

Kulesi sabelomali, uMnu Mboweni uthe i-Eskom izotakulwa ngo-R69 billion esikhathini esiyiminyaka emithathu kusukela manje - okusho ukuthi imali izoba wu-R23 billion ngonyaka. I-Eskom inikwa le mali nje, ibicele u-R100 billion. Nokho uMnu Mboweni wengeze ngokuthi uhulumeni kawuzethwesi isikweleti se-Eskom.

Uhambe emazwini ake avela enkulumweni kaMengameli Cyril Ramaphosa maqondana nokuba i-Eskom icazwe ibe yizigaba ezintathu njengengxenye yesu lokuhlenga isimo sayo semali.

Ugcizelele ukuthi ukuxhasa i-Eskom kuhambisana nemibandela, okuyinto okufanele yamukelwe njengeyenzeka noma kuphi lapho kufakwa khona imali yokuxhasa - njenga s emabhizinisini azimele.

Ukhale ngokuthi ukutakula i-Eskom akuthokozisi, wakufanisa nokuthela imali esisefweni esivuzayo. Ezinye izinkampani zikahulumeni uzihlinzeke ngo-R20 billion kulo nyaka.

Wengeze ngokuthi kuzoqiniswa imithetho yokunikeza isiqiniseko kulezi zinkampani ngokuthi usizo ezilutholayo luzohambisana nokuba kuqokwe iChief Reorganization Officer - kuleyo naleyo nkampani - ezoqapha ukusebenza kwayo nokubukeza isimo sayo sezemali. Ngaphandle kodaba olushisayo lwe-Eskom, kule nkulumo uMnu Mboweni umemezele lokhu okulandelayo:

UKULUNGISA UMONAKALO

Maqondana nokulungisa umonakalo kuhulumeni, ikakhulukazi ukubhekana nokuthu- njwa kombuso ( state capture), phakathi kokunye umemezele lezi zinyathelo ezilandelayo:

wukuqokwa kukakhomishana omusha wehhovisi lomqoqi wentela;

ukusungula kwesigaba esisha phansi kwehhovisi lomshushisi womphakathi;

isidingo sokuba kuncishiswe imali ekhishwa wuhulumeni ngamaholo ezisebenzi, okusho ukuthi izisebenzi zikahulumeni ezibalelwa ku-30 000 esezisondele ebangeni lokuthatha umhlalaphansi (55 - 59 iminyaka yobudala), zizonikezwa umhlalaphansi ngaphambi kwesikhathi. Uthe abenzenjalo ngeke bakhokhiswe intela eyinhlawulo;

Amaholo amalungu ephalamende nawe zishayamthetho ngeke anyuswe kulo nyaka;

ISABELO NGOKWEMINYANGO

Kulesi sabelomali kule minyaka emithathu ezayo, ehambe phambili kube owezemfundo othole R1,2 trillion, owezempilo u-R717 billion (kumbandakanya neNational Health Insurance), owezokuthuthukiswa komphakathi u-R900 billion athe uzothinta lezi zigaba:

ukukhushulwa kwemali yesibonelelo sezingane izoba wu-R420 ngoMbasa, ibe wu-R430 ngoMfumfu, eyabadala izonyuka ngo-R80 kuthi eyababheki ( foster care) yenyuke ngo-R40 ibe wu-R1 000.

IZINTELA

Intela edume ngokuthi yiSin Tax, efakwa ophuzweni olunamandla nakugwayi yenyuke kanje:

12c ngekani likabhiya, okusho ukwenyuka ngo-R1,74

R3,15 ngebhodlela lewayini, okusho ukwenyuka ngo-22c;

R10,16 ibhodlela lewayini elizoyizayo, okusho ukwenyuka ngo-84c;

R65,84 ngebhodlela le- whisky, okusho ukwenyuka ngo-R4,54;

R16,66 iphakethe likagwayi onemindweza ewu-20, okusho ukwenyuswa ngo-R1,14;

R7,80 ngosikilidi wezigwili isigazu, okusho ukwenyuswa ngo-64c

Utshwala besintu bona ngeke yenyuswe intela kubona.

Ezingemnandi yizo lezo ezithi intela ngophethiloli izokwenyuka ngo-29c ilitha kuthi ekadizili yenyuke ngo-30c ilitha.

UMNU Tito Mboweni obethula isabelomali sanonyaka izolo ngoLwesithathu ephalamende.