Kungqongqiswe abalisa abathathu
Basolwa ngokuhlukumeza umphakathi
SIMUNCU isimo emphakathini waseMagwaveni, oThongathi, emuva kokushiswa, kubulawe abantu abathathu abasolwa ngokuhlukumeza umphakathi endaweni.
Kubikwa ukuthi kusukela ngoLwesihlanu olwedlule, abantu bakule ndawo bashiya amakhaya abo beyolala ezihlotsheni ngoba besaba ukuhlaselwa ngabasolwa okuthiwa babulele abantu ababili endaweni, balimaza inqwaba.
Ngokuthola kweLANGA, abasolwa kuthiwa babulale uMnu Xolani Myekeni Cele (40) noMnu Shafisto Mathusi, balimaza kabi omunye wesilisa odume ngelikaSkobho - ILANGA elehlulekile ukuthola igama lakhe - okumanje kwembulwa kwembeswa kuyena esibhedlela.
Kubikwa ukuthi uMnu Cele uhlaselwe ngeSonto ebusuku ekwakhe wadutshulwa, wanqunywa phambi kwezingane zakhe nomkakhe. Kuthiwa abasolwa baqede lapho bafuna imali nomakhalekhukhwini ezinganeni zikamufi.
UMnu Mathusi kuthiwa yena ungenelwe endlini ngoMgqibelo wadutshulwa kabili ekhanda nasesifubeni. Umphakathi uhlanganile ngoMsombuluko ngenhloso yokucuthela abasolwa. Kuthiwa kube wukuzwa nje ukuthi sebefikile, wabadumela bangenelwa ngenduku maqede bathungelwa ngomlilo bashonela khona lapho.
Osekufaka itwetwe emphakathini wukuthi kunezinsolo zokuthi basekhona abanye abasolwa abasagcwele amathafa.
ILANGA lihambele imindeni eshonelwe ngoLwesibili kanti ububona ungena nje egcekeni ukuthi isimo sinzima, kwaCele igazi belisabonakala lapho kubu- lawelwe khona uMnu Cele.
UNkz Hloniphile Ngcobo, ongunina wezingane zikaMnu Cele, uthi usekude ukukhohlwa yinto ayibonile nezingane zakhe, umyeni wakhe enqunyiswa okwembuzi phambi kwakhe.
“Kuthe sesilele, sezwa sengathi kunomuntu oshaya uthayela. Uyise wezingane uvukile ngoba ezitshela ukuthi hleze abafana bendawo abagangayo. Ube esethatha nemali ngoba ethi uzosale eseyothenga ugwayi esitolo. Kube wukuphuma nje endlini, sezwa sekuqhuma isibhamu, samuzwa ekhala sabe sesivuka siyolunguza.
“Basuke lapho baya kuyena bamqedela ngokumnquma uqhoqhoqho. Kwale noma sesikhala nezingane sincenga ukuba bamxolele, kodwa baqhubeka," kusho uNkz Ngcobo.
Ilungu lomphakathi, elicele ukungadalulwa, lithi umphakathi uze ubulala abasolwa nje, yingoba amaphoyisa asoThongathi kawayi emphakathini uma ebizwa.
“Ngesikhathi sekubulewe uCele, amaphoyisa afikile sezwakala isibhamu siqhuma kwenye indawo, lapho bekuhlasela khona abasolwa, kodwa angaya khona. Kwale ngisho esekhala umuntu ecela usizo. Besicela ukuba uNgqongqo- she wezokuPhepha koMphakathi (uMnu Mxolisi Kaunda) angenelele ngoba sibi isimo endaweni," kusho ilungu lomphakathi.
UNkz Rose Ntibane, oyisihlobo sikaMnu Mathusi, uthi umlamu wakhe ubulawe ngabasolwa ezihlalele endlini.
“Sizwe kuqhuma isibhamu okuthe siyobheka ukuthi kwenzekani, samfica elele ethantaleni legazi edutshulwe kabili ekhanda nasesifubeni," kusho yena.
Okhulumela amaphoyisa, uCapt Nqobile Gwala, uthe akhona amacala okubulala amabili aphenywa ngamaphoyisa asoThongathi. Uphinde wakuqinisekisa nokushiswa kwabantu abathathu, wathi imbangela yokubulawa kwabo kayikaziwa.