ZIMKHALELE UMFUNDISI ONUKUBEZE INGANE
ULAHLWE ngelakubo, wakhalelwa ngamasongo kaSigonyela umfundisi-mthandazi waseNsukazi, oNdini, osolwa ngokushutheka umunwe esithweni sangasese sowesifazane ozalana nomkakhe, ethi uyamthandazela, umkhipha into athi ilokhu ihamba esinyeni sakhe.
Lo mfundisi, ILANGA elingeke lilidalule igama lakhe aze asho enkantolo ukuthi uyalivuma noma uyaliphika yini icala, kuthiwa ubizele lona wesifazane (20) ekamelweni lakhe ngeSonto ephuma esontweni.
Ilungu lomndeni walona wesifazane oyisisulu - igama lakhe esiligodlile ukumvikela - lithi kuthe uma efika ekamelweni lokulala likamfundisi, lapho abembizele khona, wazishaya osihlolelayo, esibuza ukuthi kakukho yini esike sikuzwe esinyeni saso kungathi kuyahamba.
“Isisulu sivumile njengoba besijwayele ukuphathwa yisilumo, umfundisi wathi uzosisiza masime phambi kwakhe asithandazele. Nempela simile, waqala ukusibambabamba ngendlela engajwayelekile, esipotoza namabele, ethandaza. Uthe esuka lapho wasiyabula iduku ebesilibhincile, wafaka umunwe wakhe esithweni saso sangasese,” kusho ilungu lomndeni.
Lithi umfundisi ubekwenza lokhu ethi isisulu masingexwayi ngoba uzama ukusisiza.
“Nakuba isisulu siphunyulile kulokhu kuhlukunyezwa, sisizwe wukuthi sitshele umfundisi ukuthi sizomemeza umkakhe. Umfundisi wethukile wasidedela. Usuke lapho wasinika u-R20, wathi masingatsheli muntu ngale nto eyenzekile.
“Okusicika kakhulu wukuthi unele wezwa ukuthi udaba lwakhe lokuhlukumeza udadawethu sesiluyise emaphoyiseni, weza kubantu abadala ethi ufuna ukukhokha amademeshe kanti amaphoyisa azosheshe afike ambophe,” kusho leli lungu.
Okhulumela amaphoyisa, uLt Colonel Thulani Zwane, uthi umsolwa uvelile eNkantolo yeMantshi yaseMahlabathini ngecala lokunukubeza ngokocansi, lihlehlele isonto elizayo.