"USHADILE" UYISE WOSANA OBELULAHLIWE
KUVELA ezithi ubekhuleliswe yindoda eshadile owesifazane (27) okhalelwe ngamasongo kaSgonyela esolwa ngokulahla ingane ebisanda kuzalwa esitamkokweni eNewlands East, eThekwini, ngeledlule.
Ibisematheni ngeledlule nasekuqaleni kwaleli sonto indaba yokuhlengwa kwalolu sana ebelusalenga umzanyana, okuthiwa izwiwe ikhala ngowesilisa obehamba emgwaqweni ekuseni.
Ukutholakala kwalolu sana kusukumise uNgqongqoshe wezeMpilo KwaZulu Natal, uDkt Sibongiseni Dhlomo, waya mathupha esibhedlela obelugcinwe kusona.
ILANGA lithole ngemithombo yalo ukuthi kusize abasondelene naye lona wesifazane ukuze aboshwe.
Baqaphelile ukuthi isisu kasisekho kwazise ubesebonakala ukuthi ukhulelwe, yize ebesifihla ngokugqoka izingubo ezinkulu.
Kuthiwa ubekhuleliswe yindoda eshadile, ehlala nomndeni wayo.
Umthombo waleli phephandaba uthi uyise wengane ubazi ukuthi umsolwa ukhulelwe.
Ngemuva kokuba eseyilahlile ingane, umtshele ukuthi siphuphumile isisu, okuthe ngemuva kosuku kwezwakala izindaba zokuthi kutholakale ingane ilahlwe esitamkokweni ngalapho ehlala ngakhona.
Kuthiwa uyise wengane usolile ukuthi ngeyakhe le ngane, walandelela, wathola ukuthi ngamanga aluhlaza ukuthi isisu siphuphumile.
Umsolwa uboshwe eyozama ukuthola usizo esibhedlela njengoba ebebanjwe yizinhlungu ngemuva kokuzibelethisa.
Okhulumela amaphoyisa KwaZulu-Natal, uColonel Thembeka Mbhele, uthe lona wesifazane uboshiwe, ubhekene necala lokuzama ukubulala ngemuva kokutholakala kwengane ekhoneni lemigwaqo uHerring Circle noBarracuda, eNewlands East ngele-dlule.
Lingenile icala lakhe eNkantolo yeMantshi eNtuzuma izolo ngoLwesithathu umsolwa engekho esesibhedlela lahlehla.