Kuxoshwe umfundi okhulelwe
Udinwe uyaveva unina
UBHODLA umlilo unina womfundi (15) waseCrossmoor Secondary School, eChatsworth, oxoshwe esikoleni ngoLwesibili ngoba ekhulelwe - okumanje unezinyanga eziwu-7 ezithwele - kwathiwa makabuye ngonyaka ozayo esekhulise ingane.
Lo mzali, esingeke simdalule igama lakhe ukuvikela indodakazi yakhe, usole uthishanhloko wakulesi sikole ngalesi senzo.
“Bengizitshela ukuthi indodakazi yami izogcina esikoleni ekupheleni kukaNhlolanja (February), ize ibuye isibelethile ngemuva kwePhasika uma sekuvulwa isikole ngekota yesibili. Ngesonto eledlule bangibhalele incwadi esikoleni bengibiza, ngathumela umfowethu (ngoMsombuluko) ukuba ayongimela ngenxa yokuthi bengikude ngokomsebenzi.
“Bakhwele badilika kumfowethu nengane, bemtshela ukuthi kayisadingeki esikoleni. Kwale ngisho ebakhombisa incwadi kadokotela ebichaza ukuthi ingane isesimeni esihle ukuthi ingaqhubeka nokufunda ngoba isekude ukubeletha, kodwa kwanhlanga zimuka nomoya,” kusho lo mzali.
Uthi ngoLwesibili uyiqhubile ingane wayihambisa esikoleni ngoba azi ukuthi umthetho womnyango wezemfundo uyayivuna ukuba ingaba sesikoleni kuze kufike isikhathi sokuba ibelethe.
Utshele ILANGA ukuthi uphoxekile uma esefonelwa etshelwa ukuthi bayiphindisele emuva indodakazi yakhe ngoba kayidingeki esikoleni.
Okunye athi kumphathe kabi kakhulu, wukuthi uthishanhloko ukhulume amagama amabi phambi kwengane yakhe ngesikhathi ethume umfowabo ukuba ayommela.
“Ngiyazi ukuthi ingane yenze iphutha ngokukhulelwa isafunda, indlela akhulume ngayo nengane uthishanhloko kangiyithandanga, eyahlulela ngoyise wengane yayo angamazi, ethi ngeke aze ayondle le ngane eyikhule- lwe,” kusho yena.
Uthi yena akalwi nesikole kodwa into ayicelayo wukuba ingane yakhe ibuyiselwe esikoleni uma isibelethile, iqhubeke ifunde njengazo zonke izingane ngoba ukuhlala kwayo unyaka wonke ingafundi kuzoyikhubaza, igcine seyenza izinto ezingalungile.
Okhulumela uMnyango wezeMfundo KwaZulu-Natal, uMnu Muzi Mahlambi, uthe: “Othisha bethu kabaqeqeshelwe ukubelethisa izingane. Umzali wale ngane akakwazi ukuthi angaqhamuka esebhokela ukuthi kuxoshwe ingane yakhe ekubeni wahluleka wukuyikhalima njengomzali ukuthi ingazibandakanyi nocansi isencane ize igcine isikhulelwe.
“Sihlale silishumayela njalo ivangeli lokuthi izingane zizithibe, zingazihlanganisi nocansi zisencane. Ukukhulelwa kwayo kukhomba ukuthi izihlanganise nocansi olungaphephile olungaholela ekutheni ithole izifo, yincane le ngane. Lo mzali bekungamele agijimele ukuyobika udaba emaphephandabeni ngoba le nto eyenziwe yingane yakhe kayiyinhle.
“Bekumele aye emahhovisini abahloli ayohlala phansi nabo njengomzali, ayicelele kahle ingane yakhe ukuthi ibuyele esikoleni.”