Bazisikele iziza ngaphandle kwemvume
Bathi bakhathele wukulinda izindlu zomxhaso ezitholwa ngobungani
AWELE emhlabathini ogqwalile amazwi emenenja kaMasipala weTheku, uMnu Sipho Nzuza elobe kwiLANGA ngoMsombuluko, ixwayisa abantu abazixebulela umkhomo emhlabeni kamasipala ngaphandle kwemvume.
NgoLwesine, iziqashi nezakhamizi zaseCato Crest, eMayville, zingenele ihlathi zalicaba, zazisikela iziza endaweni kamasipala ngoba zithi sezikhathele wukulinda izindlu zemixhaso ezabiwa ngobungani.
Lezi zakhamizi ezibalelwa ekhulwini, kusukela ngoMgqibelo zilale kuleli hlathi eliseduze kwesonto iChibi, elikule ndawo, okuthe ngoLwesibili ekuseni zangenela ihlathi zalishaya phansi, kwayilowo nalowo eziklamela isiza sakhe.
Iningi lalaba bantu lidabuka e-Eastern Cape, kanti lithi seliqede iminyaka lihlala kule ndawo, kodwa kuthi uma sekuphuma izindlu zomxhaso lishiywe ngaphandle, kodwa bese zitholwa ngisho nangabantu abangahlali eMayville.
Ekhuluma neLANGA uNkk Vuyiseka Dubula, uthe useneminyaka ewu-20 ehlala kule ndawo beya nasemihlanganweni okubhaliselwa kuyona izindlu zomxhaso, kodwa okuthi uma seziphuma bangazitholi.
“Manje sizwile ukuthi nali ithuba lokusika iziza la, sasukumela phezulu nathi, sazokala ezethu. Sesikhathele wukuhlala emiqashweni, indawo siyayifuna, kodwa singazitholi,” kusho uNkk Dubula.
Omunye wesilisa ongathandanga negama lakhe, uthe baze bathole lezi ziza nje, yingoba bekunabantu bokufika endaweni, abafike babeka imijondolo yabo ehlathini ilokhu idilizwa.
“Kuthe ngoLwesihlanu olwedlule, inkantolo yabavuna yathi mabaqhubeke bakhe kulo mhlaba bangabe besadilizelwa njengoba bevusa imijondolo yabo. Nathi sibone kungcono ukuba singene ngoba kusho ukuthi sekuvumelekile ukwakha kule ndawo.
"Kuthiwa uma kwakhe abantu bangaphandle thina ekade safika la sihlale nje sibuke? Ngeke kwenzeke lokho. Nathi siyangena la, siyazidinga izindawo.
"Omasitende bala sebezicebisa ngathi njengoba sebebiza o-R500 ngomjondolo,” kusho lo wesilisa.
Ikhansela lakule ndawo, uMnu Mzi Ngiba, lithe lolu daba bese lufikile kulona, kodwa layekela abangaphezu kwalo okuyibona abalusebenzayo.
“Mina bekungaselula ukuba ngiyobakhuza ngoba kuthiwa banikezwe yinkantolo imvume yokwakha. Sekufanele kube wuphiko lwezezindlu kumasipala olusukumayo, mina njengekhansela kangikwazi ukuphikisana nenkantolo.
"Okubuhlungu wukuthi le nto yokuziklamela umhlaba ngale ndlela, yenza bagcine sebethatha nomhlaba obubekelwe ukwakha izindlu zomxhaso,” kusho uMnu Ngiba.
Likuphikile ukuthi izindlu zemixhaso kule ndawo zitholwa ngobungani.
Lithe inkinga wukuthi indawo yaseMayville incane, manje bonke abantu bavele bafune ukuyohlala kuyona ngoba iseduzane neTheku, okuvele kube nzima ukubenelisa bonke.
Okhulumela uMasipala weTheku, uMnu Msawakhe Mayisela, uthe kuyiphutha ukuthi laba bantu banikezwe imvume yinkantolo ukwakha kule ndawo.
“Inkantolo ithe akuke kumiswe ukudilizela abantu imijondolo njengoba kusenecala eliphakathi kukamasipala nekomiti labahlali basemjondolo,” kusho uMnu Mayisela.