UCINDEZELE USANA NGOMQAMELO
UVELE eNkantolo yeMantshi yaseThekwini ngoMsombuluko owesifazane (20) waKwaMashu, okhalelwe ngamasongo kaSigonyela ngezinsolo zokulahla ingane yakhe - enezinyanga izelwe - emgqonyeni kadoti eKing eEdward Hospital, ngeledlule.
Lo owesifazane - esingeke silidalule igama ukuvikela isithunzi sengane - kuthiwa uboshwe kulesi sibhedlela emuva kokucindezela ingane yakhe ngomqamelo, wayigoqa ngeshidi maqede wayifaka emgqonyeni.
Ngokuthola kweLANGA, umntwana uzalwe isikhathi singakafiki, unina ubenezinyanga eziwu-8 ezithwele. Esikalini ubeshaya u-1.2kg kanti ubegcinwe ebhodleleni esibhedlela.
Umthombo ongaphakathi esibhedlela utshele leli phephandaba ukuthi ngosuku lwesigameko, lo owesifazane ubencelisa ingane yakhe e- nursery (okuyigumbi lezingane). Uthi umhlengikazi obesenursery uthe angaphuma eya kwelinye igumbi, lona wesifazane wathola ithuba lokwenza le migilingwane. Kuthiwa umhlengikazi uthuke wona uma ebuyela e- nursery efika ingane ingekho, wabuza unina kodwa wangena ezintangeni.
“Uvele watatazela wabiza onogada basesibhedlela. Abahlengikazi nonogada basewodini bayibheke ngaphansi kwemibhede nasemawindini ingane do, kwaze kwaphoqeleka ukuba kukhishwe amashidi emibhedeni yabanye onina bezingane kubhekwa yona,” kusho lo mthombo.
Uthi igcine itholakale emgqonyeni okulahlwa kuwona izinaliti, igoqwe ngeshidi icindezelwe ngomqamelo, kanti ibinezimpawu zokuncisheka umoya.
Esitatimendeni esikhishwe nguNgqongqoshe wezeMpilo KwaZulu-Natal, uDkt Sibongiseni Dhlomo, ugxeke onina bezingane abazilaxazayo njengoba siveza ukuthi kuleli sonto elidlule kutholakele izingane ezimbili, enye itholwe esitamkokoweni eNewlands.
Okhulumela amaphoyisa KwaZulu-Natal, uLt Col Thulani Zwane, uthe likhona icala lokuzama ukubulala elivuliwe esiteshini samaphoyisa eMbilo, kanti unina wengane uvele eNkantolo yeMantshi yaseThekwini ngoMsombuluko.
Kulindeleke ukuba abuyele kule nkantolo mhla ka-25 kuMbasa (April).