Ubenephupho lokwethula i-OPW
BENGIYINGANE ENGABAMBEKI
UMETHULI wohlelo lwezemishado kumabonakude, uVele Manenje, uthi uyazi ukuthi kube nokunengeka kubalandeli bohlelo asengumethuli walo, i-Our Perfect Wedding (OPW) ngesikhathi beqala ukubona ubuso bakhe ngenxa yokuthi besebejwayele ukubona obukazakwabo, uNomsa Buthelezi. Ngemuva kwezinyanga ezintathu kusukela eqalile ukwethula lolu hlelo, ILANGA libe nethuba lokukhuluma nale ntokazi ezalelwe eVenda, eLimpopo yakhulela eGoli, esiyintandokazi kwabaningi ngenxa yomoya wayo ophapheme futhi okhululekile. Intokomalo yayo izwakala ngisho nixoxa ocingweni, ngathi nazana kudala. Akaqali ukuba ngaphambi kwamakhamera njengoba phambilini eke wethula uhlelo lwezingane iTakalani Sesame, olwezenkolo iSiyakholwa neRiconingo. Abanye bamazi njengomlingisi kwiRing of Lies, kuMuvhango neLockdown. “Ngiyizame kabili inhlanhla yokuba ngumethuli we-OPW. Okokuqala ngashiya phakathi ngenxa yokuthi kwakushayisana nezikhathi zami zokuqopha kwiRing of Lies. Nokho angililahlanga ithemba. I-OPW ingenye yezinhlelo engizilandela kakhulu futhi ngenxa yokuthi benginephupho lokuyethula ngelinye ilanga, ibingangiphuthi. Bengifunda okuningi kozakwethu abebengaphambili bese ngibheka ukuthi mina yimuphi umsoco engizofika nginonge ngawo mhla sengiyingxenye yayo,” kusho yena. Uthi ngesikhathi enikwa ithuba ubazi ukuthi amehlo azothi njo kuyena, agxekwe futhi aqhathaniswe nozakwabo. “Lolu hlelo lunababukeli abaningi ngoba luthinta abantu futhi ludlala ngesikhathi lapho imindeni isuke indawonye. Ngeke uhlale ungabi nengcindezi. Kwenzekile lokho ngaqhathaniswa, kwakhona nabaphawula ngesisindo somzimba wami ( body shaming) kwaze kwangenelela uzakwethu uNomsa owangeseka wangiqinisa idolo, nakimina ehla amaphaphu.
“Ngingumagcino ekhaya ngakho ngiyethemba uyabazi omagcino ukuthi bangonontandakubukwa. Bengithanda ukubaculela, ngidanse noma ngilingise. Bengicasuka kabi uma bengangihalaliseli noma bashaye ihlombe. Bengingabambeki, bengihlale ngimatasa, namanje ngisenjalo,” esho ngolukhulu uhleko. Uthi ukhule enothando lokulingisa kumakhonsathi waze wangena esikoleni, kwagcina kuyinto emngene egazini. “Ngikhuliswe emndenini wama- academic kangangoba bebeyingabaza indaba ye- art kodwa ngenxa yokuthi abazali bami baseseke kakhulu, bavuma ukuba ngibhalise eNational School of the Arts. Ngiqeda nje esikoleni ngingene ngaphansi kwe- agency enkulukazi iMLA. Isikhangiso sokuqala engasenza nabo kwaba ngese- tour yomculi waseAmerica, u-Avril Lavigne yango-2005,” kusho yena. Kusukela lapho akabange esabheka emuva kuze kube manje njengoba igama lakhe liqhubeka lidlondlobala.
UNCOMA ITHALENTE LIKA-WARREN MASEMOLA
“Angivamisile ukuzinciphisela amathuba okukhula kodwa angikaze ngizicabange ngingumlingisi. Kulo mkhakha ngigqugquzelwa wukubona abantu abafana noWarren Masemola. Unesipho esehlukile sokungena khaxa kunoma yiyiphi indawo ayilingisayo futhi ayilingise ikholakale. “Uma kumele abe yisitabane, ungena khaxa, kanjalo noma kumele abe yisigebengu,” kusho uVele.
OKUMTHOKOZISAYO
Okwamanje okumenza ahlale emamatheka uthi yithuba lokuba yingxenye yohlelo oluyintandokazi kuyena, okumnika ithuba lokuhambela izindawo ezinhle ezahlukene nokumenywa emishadweni enhlobonhlobo nedrama ehambisana nayo. Uyagcizelela ukuthi esikubona ohlelweni kusuke kwenzeka ngempela, akukho okulingiswayo ( staged). Akaphumelanga obala ngomshado angeke awukhohlwa. “Yonke iyafana ngoba injongo yabasuke beshada wukuba umcimbi ube perfect, lokho okwenzeka ngezindlela ezahlukene okubalwa ne- drama esuke ikhona," esho.
Olwakhe uhlu lwePerfect Wedding
I-gown eyi-princess style I- venue ngingathanda ibe seNandoni Dam, eVenda Indoda eqotho ezihloniphayo futhi emesabayo uNkulunkulu.