Sikhona isidingo sokushefa?
BANINGI abantu emphakathini ababa nemibono ethile ngemizimba yabantu besifazane.
Izinto eziningi ezithinta bona zigcina sezikhulunywa esidlangaleni - kuke kuqubuke inkulumo mpikiswano nje ngemizimba yabo. Isibonelo nje wukushefwa kwezinwele, kusukela kwezisemakhwapheni, emilenzeni nezisendaweni yangasese.
Ukubonakala kwezinwele ngaphansi kwekhwapha mawuphakamisa isandla, abanye bakuthatha njengento enyanyisayo ekhombisa ukungazithandi. Umbuzo osalayo
ngothi kungani izinwele zasekhanda zemukelekile kunalezo ezikwezinye izingxenye zomzimba?
Eminyakeni eyedlule u-Unathi Nkayi uke waba sematheni ethi uyajabula esiqeshini somncintiswano wama-Idols SA, waphakamisa izandla, kwavela izinwele zasemakhwapheni. Ukuhlaselwa akuthola ezinkundleni zokuxhumana kwatshengisa ngokusobala ukuthi lezi zinwele kazithandeki.
Usaziwayo u-Amber Rose ungomunye wabalwela ukuba abesifazane babe nenkululeko yokuzikhethela ukuthi bayathanda yini ukushefa noma cha. Uke waba ne- hashtag ethi #BringBackTheBush, wafaka isithombe sakhe kwi-Insta- gram lapho ayeveze khona obala isitho sakhe sangasese singashefiwe kodwa-ke leso sithombe sabuye sasuswa. Abanye bamncoma ngalesi senzo kanti kwabanye kasamukelekanga.
UMSUKA WOKUSHEFA
Ngokwe-MC Network, umkhankaso wokuqala wokugqugquzela ukushefa kwabesifazane uqale ngama-1900’s. Ngo-1915 uKing Camp Gillette wasungula umkhiqizo wokushefa obizwa nge-Milady Decollete.
Kwizikhangiso abesifazane babegqugquzelwa ukuba bashefe ikakhulukazi emakhwapheni ngenxa yezingubo ezingenamkhono ebe-sezingenisile ngalesi sikhathi.
Imfashini yangama-1940’s nama 50’s yenze kwanesidingo sokuba abesifazane bashefe ngisho imilenze yabo. Ngesikhathi sempi yomhlaba kube nokushoda kwenylon, abesifazane bangakwazi ukugqoka ama- stockings.
Ukuze imilenze yabo ibukeke kahle bekumele bayishefe, kanti phambilini abantu abebekade baziwa ngokuthi bayashefa bekuba ngabadansi kwazise imilenze yabo beyinakwa kakhulu.
Ngama-50’s abesifazane bese bazi vele ukuthi kumele bashefe imilenze, amakhwapha, bathwize amashiya ukuze ame kahle kodwa hhayi laphaya ezansi kwandawo.
Ngokufika kwama- bikini abesifazane babe sebebona kumele bazicwecwe izinwele nasesithweni sangasese. Ukusabalala kwezithombe nama- video abesifazane abashefile yikho okwenze nabanye baba nombono wokushefa.
Lokhu-ke kuveza ngokusobala ukuthi kawukho umthetho obekiwe wokuthi kuwumgomo ukuba abesifazane bashefe. Kodwa bekuba yisinqumo somuntu.
Le ndaba yokushefa ihlezi iba yimpikiswano kwabaningi. Abanye baye bakhale ngokuthi abesifazane babhekene nengcindezi ngemizimba yabo ngenxa yokuthi kunabathile abahlale bebaqaphile (abesifazane), batshelwe ukuthi kumele bakhuluphale noma banciphe kangakanani.
Manje sekuyingcindezi yokuthi kumele bashefe laphaya, emakhwapheni nasemilenzeni. Iningi labashefayo bathi bashefiswa wukuthi kumele bahlanzeke, abanye benzela ophathina babo kanti abanye kuyindlela yokuzinaka.
BATHINI ABEZEMPILO? Kuya ngawe ukuthi uyathanda ukushefa noma cha. Yize kunjalo kubili okuyingozi okumele ukuqaphele. UDr Michelle Metz oyigynaecologist uthi: “Uma uhlale ushefa njalo ungagcina unenkinga ebizwa nge- folliculitis.” Lapho uba namaqhubu amhloshana enziwa wukungashefi ngendlela okuyiyo njengokusebenzisa i- razor ebuthuntu noma uku-ngasebenzisi i- shaving cream. Kodwa-ke ungethuki, lokhu kuyelapheka ngokusebenzisa okhilimu besikhumba noma ama- antibiotic.
Okunye okubi wukuthi ungaba nenkinga yokuba izinwele zikhulele ngaphakathi ( ingrown pubic hair) esikhundleni sokuba ziphumele ngaphandle, okwenza ukuba ugcine unamaqhubu ( bumps) nesikhumba sizwele. Uyakwazi ukukuqeda lokhu ngokusebenzisa ukhilimu othile wokugcoba.
Okumele ukubeke engqondweni uma ufuna ukushefa izinwele eziseduze kwesitho sangasese wukuthi kunesizathu sokuthi izinwele zibe lapho zisuke zikhona.
“Izinwele zangasese zibekwe laphaya ukukuvikela ngesikhathi kukhona ukukhuhlana okwenzekayo (mhlawumbe mawenza inkonzo yasekamelweni). Kasikho isidingo sokuzisusa, kodwa uma uthanda ukuzishefa nalokho kulungile,” kuchaza yena.