Likhona ikhambi ngolomhlaba
UMnu Lonsdale uzobe eyisikhulumi kwi-
SELUPHUMELE obala uqweqwe lomlimi, olunguMnu Jimmy Edward Lonsdale (75) ( osesithombeni), oseluthathe umhlalaphansi ngodaba olushisayo mayelana nokuvivinywa komthetho omayelana nomhlaba, ukuze uthathwe ubuyiselwe kuhulumeni ngaphandle kwesinxephezelo.
Lokhu kwenzeka emuva komzukuzuku weqhinga elibizwa nge “willing buyer willing seller” (ukudayisa ipulazi noma ukulithenga ngaphandle kwempoqo)) osekunesikhathi eside lukhona, kodwa olungatheli izithelo zempumelelo nalapho kwenzekile ukuthengiselana ngomhlaba.
Lolu qweqwe lomlimi, luzoba yisikhulumi engqungqutheleni ye-United Nations (UN), i-52nd United Nations Economic Commission for Africa Conference ngodaba lokuqeda ububha e-Afrika ngo-2030.
Le ngqungquthela izokuba seAddis Ababa, e-Ethiopia kusukela mhla ka-27 kuNhlolanja (February) kuya kumhla lulunye kuNdasa (March).
UMnu Lonsdale obengumlimi KwaZulu-Natal, ushabashekela ukubona iphumelela indaba yezinguquko ngobunikazi bomhlaba, kodwa ngendlela ezothela izithelo ezinhle, kwazise ezombusazwe kolunye uhlangothi nabalimi ngakolunye, bayehluleka ukuthola ikhambi. Indikimba yenkulumo kaMnu Lonsdale izokuba sekunxuseni abalimi abamhlophe eNingizimu Afrika ukuba baqinise imizamo yabo yokungenelela, basize uhlelo lukahulumeni lapho lwehluleke khona maqondana nezinguquko ngodaba lomhlaba.
Lo mlimi osesebenze isikhathi esingaphezulu kweminyaka ewu20 ezinhlelweni ezehlukene zenguquko ngobunikazi bomhlaba KwaZulu-Natal, uthi kunamathuba amaningi lapho abalimi abamhlophe bengangenelela, bahlanganyele nohulumeni emizameni yokuvusa amapulazi afadalele.
“Okokuqala, kunomhlaba omningi kahulumeni ongenzi lutho, nalawo mapulazi anikezwe abalimi bomdabu agcine ngokufadalala, noma umhlaba ongasetshenziswa ngokugcwele.
"Okwesibili, impahla yokusebenza njengaleyo yohlelo lokunisela edinga ukunakekelwa, njengamanje kayisebenzi nhlobo," kusho yena.
Uthe nokho umqondo wabalimi, okahulumeni, wuphiko oluzimele lwamabhizinisi nomphakathi wasemakhaya - kudingeka iguquke ukuze kuvele izithelo.
“Ngisebenze kakhulu ezinhlelweni zokufundisa lapho abalimi bebesiza umphakathi wasemakhaya ukuba ulime. Ngeshwa iningi labalimi licabanga ukuthi ukuba ngumbonisi ( mentor) kusho ukwenza umsebenzi bona qobo lwabo.
"Obonisayo uye ahlale phansi axoxe nomphakathi, awusize ekubekeni imigomo, kwenziwe izinhlelo zamasonto onke, awukhuthaze futhi awubikele ngokwenzekayo.
"Ngamanye amazwi, ukuba ngumbonisi kudinga ikhono lekhethelo nosizo olubanzi," kusho uMnu Lonsdale. Ngakolunye uhlangothi, umphakathi wasemakhaya ezindaweni eziningi uphethwe yisifo asibize nge- deprivation syndrome, okusho ukungenwa yisifo sokweswela.
UMnu Lonsdale uthi incazelo yegama elithi 'Ubuntu' kumele iqondisiswe kahle, yingakho kudingeka uguquko emiqondweni yabalimi abamhlophe ukuze basebenzisane nomphakathi ngempumelelo.
Enkulumeni azoyethula e-Ethiopia, unohlu lweziphakamiso akholwa wukuthi zingaphumelela ukuguqula ezolimo eNingizimu Afrika.
Isibonelo, uthi ezolimo nezinhlangano zamabhizinisi bangalekelela ekufundiseni amalungu abo ukuthi inzuzo bangayenza kanjani ngentuthuko yasemakhaya, kanti izinyunyana zabalimi kumele zithole abazofundisa ngokuziphilisa komphakathi ezifundeni ezahlukene abakuzona.
“Kumele abalimi bafundiswe ngemihlomulo yokuthengisela izisebenzi izabelo zobunikazi. Ngikholwa wukuthi lokhu kunganciphisa ukwesaba ngokulahlekelwa yipulazi uma kuthathwa umhlaba ngaphandle kwesinxephezelo. Isiphetho siba wukwenyuka komkhiqizo, kwenyuke nokutshalwa kwemali ( investment) noguquko kwezomnotho nempilo yomphakathi oyizisebenzi zasepulazini” kusho yena.
Uthi ukholwa wukuthi akusadingeki kukhulunywe ngokwahluleka kwangesikhathi esedlule, kodwa kubhekwe amathuba angase akhe ingomuso elingcono kwezolimo. Wazalwa mhla zizine kuLwezi (November) 1943 eMgungundlovu. Ulimi aluncela ebeleni yisiNgisi kanti nesiZulu uyasikhuluma. Ukhonza ebandleni lamaWeseli. Ukhulele epulazini eliseUnderberg elikhiqiza ubisi, inyama nezimvu. Umatikuletsheni wawuphothula ngo-1960 eMaritzburg College, wadlulela e-University of Natal, osekuyi-University of KwaZulu Natal manje. Lapha wenza iziqu zezolimo, i-BSc Agric ngo-1961-1965, wagogoda nge-Agronomy. Kuthe ngo1966-1968 wathola iziqu zeMSc Agric lapho afunda phakathi kokunye ngeSoil Science. Phakathi kokunye ucwaningile ngezidingo zikakotini, amantongomane nokolweni. Ngo-1972 ube yimenenja yepulazi eRand Mines kanti ePilgrims Rest ubesepulazini elikhiqiza amazambane, ubhontshisi, ummbila nokolweni. Ngo-1972-1976 usebenze njengeResearch Agronomist, eRhodesia Sugar Association lapho abecwaninga ngezidingo zokuniselwa komoba nokunye okuphathelene nawo. Kungalesi sikhathi lapho ethole ithuba lokuya e-Europe naseUnited States of America. Ngo1976-1986 usebenzele iTongaatHulett Sugar engumsizi wemenenja eDarnall. Kusukela ngo-1986 kuya ku-2004 ubengumnikazi wepulazi lomoba ekhiqiza u-10 000 tons ngonyaka eMfolozi Flats nasoPhongolo. Kusukela ngoNhlolanja 2004 kuya kuLwezi 2008, usebenze emnyangweni wezolimo esigabeni seAgricultural Development Support Services, lapho ebesebenza ngoxhaso lukahulumeni kubalimi abasafufusa, enza ama- business plan kulo mnyango futhi ephathiswe imisebenzi emikhulu yokubuyiswa komhlaba kumbandakanya izinyamazane, ubisi, inyama nezitshalo. Ubeqondene nokuqoka, ahlole nabafundisayo. UMnu Lonsdale utholakala kule nombolo: 073 217 5353 ne email ethi:lons@ telkomsa. net.