SIGUDLA NOGALAKAJANA ABDUL MILAZI
UKHUKHULELANGOQO wengqungquthela yabesilisa eqale ngosuku lwezithandani, olwaziwa nge-Valentine’s Day, kuthiwa izoqhubeka kuze kuyofika uKhisimusi ngoba kunamadoda anedliso eselehlule imithi yokuphalaza nochatho.
Elokuchatha nokuphalaza liphakanyiswe ngosuku lwesibili lwengqungquthela ngoba ngolokuqala amadoda abedamane ephuma eyophendula izingcingo, ebika kubafazi bawo ukuthi izingxoxo zithini.
Kuthe noma kuthiwa omakhalekhukhwini mabacinywe, kuvele kwanhlanga zimuka nomoya. Ababhemu bese beziphumela bona, benze sengathi baya endlini encane kanti bayoshayela abafazi.
Leli lokuthi ingqugquthela iqhubeke kuze kufike uKhisimusi, livunywe ngo-elethu yiningi lamadoda esaba abafazi bawo ngoba abengafuni ukubuyela emizini yawo.
Phela kuthiwa abafazi besimanjemanje bayashesha ngempama endodeni, okuyinto abayifunde ebelungwini. Kuthiwa-ke indoda kayilingi iphindisele ngoba iyoboshwa izandla nezinyawo.
Ingqungquthela ibisifana nesikole sojahidada, lapho kungapheli ngisho imizuzu eyishumi engekho ocela ukuphuma.
Lokhu kungikhumbuze ngisenza usekhondiye, phela satshelwa ukuthi asibocela ngesiNgisi uma sifisa ukuthi 'shelele. Kwathiwa asibothi: “may I please go out”, thina-ke sagcina sesibiza ukuya endlini encane sithi “umgo awuthi”. Wawuzwa umuntu ethi “ngisaya emgo”.
Le nkinga ka'mgo' iqale yabizelwa abefundisi bezinkonzo ezahlukene, kodwa umthandazo wangasebenza. Kubonakele nje ukuthi isidinga uJesu yena siqu sakhe, kodwa kakubanga khona ngisho namunye umfundisi noma ikholwa-ke nje ebelinesiqiniseko sokuthi ubuya nini.
Kugcine sekubizwa izinyanga, izangoma nabathakathi imbala ukuze bayifakele izipopolo le ndaba.
Abakhunkuli abafike nezimfene notokoloshe besifazane, babuyiselwe emuva, badonswa ngendlebe, bechazelwa ukuthi ubulili bubaluleke kakhulu kule ngqungquthela. Kube sekuyavunyelwana-ke ngokuba kunokuba ingqungquthela ivulwe ngomthandazo noma ihubo lesizwe, kuyomele ivulwe ngokuphalaza, bese kudliwa isidlo sasekuseni.
Kuvunyelwene ngokuba ivalwe ngokuba bonke abantu bachathe ngaphambi kwesidlo sasebusuku. Isinqumo sokuba le ngqungquthela iqhubeke kuze kufike uKhisimusi, sikhishwe ngesikhathi kubonakala ukuthi amanye amadoda anezidleke zedliso ngoba adliswe ngabafazi nomakhwapheni.
Kangisakhulumi-ke ngalaba okuthiwa ngama- blesser, batholwe benezinhlobonhlobo zedliso, bekuthi uma bephalaziswa kuphume amakhekheba, wena owabona isidleke sezinyosi.
Njengoba bengiyisikhulumi esiqavile kule ngqungquthela, ngexwayisiwe ngokuthi inkulumo yami kumele ingabi namagama aveza noma adalula ubulili bomuntu ngoba kulesi sikhathi esiphila kusona, kunabantu abangaziboni bengamadoda noma bengabafazi.
Kuthiwe ngingalokothi futhi ngikhulume ngobucebi ngoba abantu abahlwempu bazophatheka kabi. Imfundo nobufundiswa nakho akuvumelekile ngoba abangayanga esikoleni nabaphuma 'ngolusese' bazozizwa bengemukelekile.
Namagama nje asho ubude nobufushane, ukuzaca nokukhuluphala, ubumnyama nobumhlophe, kuthiwa nawo ayachema. Ngithe uma ngibuka la magama okuthiwa ngingawasebenzisi, ngabona nje ukuthi kayikho phela le nkulumo engizoyibhala.
Ngase ngiyabuza ukuthi kanti le ngqugquthela akuyona yini eyabesilisa, bavuma, ngabatshela ukuthi leli gama lengqungquthela liyachema nje lona lilodwa, ngoba liveza ubulili, futhi abesifazane abamukelekile.
Ngithe uma ngisho njalo, ngabona zona lezi zifundiswa ebezingitshela ngala magama sezingindwazele okwalaba bafana ababhema i- whoonga noma i- nyaope.
Ngibe sengiyabatshela ukuthi mhlawumbe kumele bathi ukuqinisa ngasochathweni, kungenzeka lobu bulwembu obusengqondweni buphume ngezansi buphelezelwa yidliso.