KUHLUKANA INHLOKO NESIXHANTI KWEYE-MDC
ZIZOGCOTSHWA ngoMgqibelo izingqwele ezintsha zeMultiChoice Diski Challenge (MDC) ngemuva kwemidlalo ezogijinyelwa eMakhulong Stadium, eTembisa.
Le midlalo okungeyokugcina yalo mqhudelwano kule sizini, yiyona ezokube ihambisana nomcimbi wobumnandi.
Eminye izokube iqhubeka ezinkundleni ezahlukene zakuleli. Amakilabhu amane asembangweni wokudla ubhedu kulo mqhudelwano, azokube eyingxenye yemidlalo yaseTembisa.
Kuwona kubalwa iBloemfontein Celtic ezihola phambili ngamaphuzu angu-29 nePolokwane City enangu-28. Bese kuba yiCape Town City esendaweni yesithathu neSuperSport United ekweyesine.
Womabili la makilabhu anamaphuzu angu-26 ngayinye. ISuperSport izovula inkundla neFree State Stars emdlalweni ozokuba ngo-09h00. ICape Town City izodudulana nePolokwane ngo-11h00, kanti lo mdlalo ungomunye webhekwe ngabomvu.
ICeltic izothola ithuba lokuba yizingqwele ngesitayela njengoba izovala lo mqhudelwano ngokubhekana neKaizer Chiefs ngo-13h00.
ICeltic idinga ukunqoba lo mdlalo bese igcotshwa njengezingqwele. Kuthiwa lizodalulwa ngoMsombuluko izwe elizovakashelwa yizingqwele zanonyaka. Kayikho neyodwa ikilabhu esike yanqoba lo mqhudelwano kulawa asembangweni nonyaka.
Umphakathi uzongena mahhala kule midlalo kodwa kumele ulande amathikithi eMakhulong Stadium namuhla ngoLwesine nakusasa ngoLwesihlanu ngo13h00 kuya ku-18h00 kuzona zombili izinsuku. Free State Stars vs SuperSport United 09h00, Cape Town City vs Polokwane City 11h00, Kaizer Chiefs vs Bloemfontein Celtic 13h00. : Maritzburg United vs Highlands Park 10h00. Chippa United vs Golden Arrows 10h00. Mamelodi Sundowns vs Bidvest Wits 12h00. Orlando Pirates vs Black Leopards 12h00. AmaZulu vs Baroka 12h00.