ITHUBA LOKUZITHINTITHA KUSIBONISO GONYA
ZIYINSADA kule mpelasonto izimpi zesibhakela KwaMsane Hall, eMtubatuba. Lezi zimpi zizoqala ngoMgqibelo zisongwe ngeSonto.
Kuhloswe ngazo ukushaya izinyoni ezimbili ngetshe elilodwa njengoba zididiyele ama-amesha nezabesigaba esikhokhelayo.
Amabhokisa akhokhelwayo asethubeni lokunyuka ohlwini lwagaqele izicoco zakuleli, kanti ama-amesha alwela ukungena eqenjini lesifundazwe elizokuya emidlalweni kazwelonke yeSanabo.
Ama-amesha azokwenza kahle ezingeni likazwelonke, azozibeka ethubeni lokungena esikwatini esizomela iNingizimu Afrika emidlalweni yangaphandle.
Kungenwa mahhala kuzona zombili izinsuku.
Lezi zimpi ziyingxenye yohlelo lokuthuthukiswa kwesibhakela olufuqwa wuMnyango WezeMidlalo KwaZulu-Natal oholwa nguBongi Sithole-Moloi onguNgqongqoshe. Lo mnyango ubambisene nophromotha abehlukene abaholwa nguZandi-le Malinga weStarline Boxing Promotions nabeKwaZulu-Natal Olympic Style Boxing Organisation yona eholwa nguSandile Sibisi onguMengameli.
Abanye abayingxenye yazo wumasipala waseMtubatuba noMkhandlu waseMkhanyakude. Esigabeni esikhokhelayo, kubhekwe kakhulu impi ezokuba phakathi kukaSiboniso “Tiger” Gonya waseMtuba noMawande Mbusi waseGauteng ngoMgqibelo.
Le mpi ezokuba yimizuliswano eyisithupha, uGonya uhlela ukuzithintitha ngayo njengoba sekuphele unyaka engangeni eringini.
Ugcine ukulwa ehlulwa nguZolani Tete empini ethathe imizuzwana emithathu ngo-2017 eBelfast City, eNorthern Ireland, e-United Kingdom.
Ukunqoba kukaGonya le mpi kungamsiza ukubuyisa ukuzethemba bese ekwazi ukuqala izinhlelo zokubuyela ezingeni abekulona phambilini.
USibisi uthi izifunda ezingu-11 zaKwaZulu-Natal zizothumela amabhokisa esilisa nawesifazane. Uthi amabhokisa azokalwa isisindo kusasa ebusuku ukuze izimpi ziqale ekuseni ngoMgqibelo njengoba emaningi amabhokisa azokube elwa.
UZandile uthi konke sekumi ngomumo ngalo mqhudelwano obuvamise ukusingathelwa e-Olive Convention Centre, eNorth Beach, eThekwini.
UThabo Mofokeng woMnyango WezeMidlalo, uthi bazoqhubeka nokuyisa lo mqhudelwano ezindaweni ezahlukene ngenhloso yokufukula lo mdlalo obungaconsi kwabaningi ngesikhathi usakhonjiswa kumabonakude ngamaSonto ntambama.