SINGCOFE I-CHIEFS ISIKHULU SE-CHILLI BOYS
UNGCOFE iKaizer Chiefs ngokushikiliswa ngama-amesha uSiviwe “Chippa” Mpengesi oyisikhulu seChippa United.
IChiefs iphenduke inhlekisa ezinkundleni zokuxhumana emuva kokuba idlulele kanzima kumaquarter final eNedbank Cup ishikiliswa yiMagic FC egijima kwiSafa Western Cape ABC Motsepe League.
IChiefs ihlule le kilabhu ngo-3-0 esikhathini esengeziwe okuyinto ephendulwe ihlaya ngabathandi bebhola.
Namuhla ngoLwesine ngo-18h00 kuzoqhathwa amakilabhu adlulele kwi- quarter final yalo mqhudelwano emcimbini ozokuba seGoli. Lo mcimbi uzosakazwa bukhoma kwiSS 4.
UMpengesi esohlelweni lwasekuseni kuMhlobo Wenene ngoMsombuluko, ubuzwe ukuthi iyiphi ikilabhu angafisa ukutonyulwa nayo uma sekuqhathwa amakilabhu adlulele kwi- quarter final.
Uvele waphendula inhlekisa iChiefs ethi: “Ngihalela le kilabhu eshikiliswe ngama-amesha. Ngiyathandaza nje ukuthi ngitonyulwe nayo ekhaya khona sizozigwazela ibhece.”
Ebuzwa ngumsakazi ukuthi ngabe usho iChiefs yini, uMpengesi uvumele phezulu wathi usho yona impela. Nokho ube esekubeka kwacaca ukuthi angajabula uma ikilabhu yakhe ingadla ubhedu kule nkomishi.
“Siyayifuna le nkomishi. Uma ngibuka indlela esidlala ngayo nginethemba lokuthi sizoyinqoba. Kodwa-ke kufanele sihlule iLamontville Golden Arrows kuqala esizobhekana nayo koweligi ngoLwesihlanu ngoba i-top 8 siyibhekile futhi siyabona ukuthi sisengayithola,” kusho uMpengesi.