Ithuba lokuzibekisela indawo kwiComrades
Kubhekwe uBongumusa Mthembu kwi-PMB City Marathon
KUBHEKWE uBongumusa Mthembu ( osesithombeni) kwiMaritzburg City Marathon ezokuba ngeSonto kusuka ngo-5 ekuseni isukela eNew England Road ngaphandle kwaseGolden Horse Casino, eMgungundlovu, isongwe enkundleni yamahhashi eScottsville.
UMthembu ungomunye wabasubathi abahlonishwayo eNingizimu Afrika njengoba eyingqwele yeComrades Marathon kanti uzosebenzisa lo mjaho ukwenza isikhathi sokuba yingxenye yeComrades neTwo Oceans.
Lo mjaho uhambisana neHalf Marathon ezoqala ngo-5 ekuseni bese kuba yi-10km ezoqala ngo-9 ekuseni. NgoMgqibelo kuzokuba neTrial Run yebanga lika-7km no-14km nemijaho yodado.
Ngokusho kukaJohn Hall ongumdidiyeli walo mjaho, owangeSonto ungenelwe ngabasubathi abangaphezulu kuka8000. UHall uthe izinombolo zizoqala ukulandwa ngoLwesihlanu nangoMgqibelo ngokwehlukana eCasino. Uthi abasubathi abangenawo amalayisensi bazothola awesikhashana abiza u-R50 kwiMarathon nakwiHalf. “Abasubathi kumele baqinisekise ukuthi balandela imithetho ye-Athletics South Africa (ASA) yokugqoka amalayisensi, bangambozi imibhalo yabaxhasi ngezinombolo zom- jaho ngoba abazokwenza kanjalo ngeke bayithole imiklomelo yabo.
"IMarathon ihlelelwe abasubathi abafuna ukwenza izikhathi zokubamba iqhaza kwiComrades nakwiTwo Oceans Marathon ngokwahlukana,” kusho uHall.
Lo mjaho ukhula ngesivinini esikhulu njengoba ungenelwa ngisho nangabasubathi abaqhamuka ngaphandle kwaseNingizimu Afrika. Abasubathi abazokwenza kahle bazohlomula ngemiklomelo enhlobonhlobo okuhlanganisa imali, izikibha nezindondo.
Kusenjalo, ILANGA lithole ukuthi iZululand District Marathon (ZDM) 56km obekulindeleke ukuba ibe ngomhla ka-10 kuNdasa (March) isukela Olundi isongwe KwaNongoma, bahlongoza ukuyihlehlisela umhla ka-24 kuwo uNdasa.
Kwenzeka lokhu nje, iNongoma Mayoral Race, obekulindeleke ukuba ibe ngomhla ka-9 kwephezulu yahlehliselwa iSonto, isiphinde yahlehliselwa usuku olungaziwa.