IPirates ilole izembe konozinti
Izingela uDarren Keet weziTshudeni
LILOLIWE izembe konozinti be-Orlando Pirates njengoba kuvela ukuthi le kilabhu ihlela ukubakhomba indlela uma kusongwa isizini.
IBucs izobhekana namaZulu FC kowe-Absa Premiership ngoMgqibelo ngo-20h15 e-Orlando Stadium, eSoweto. Leli phephandaba lihletshelwe yimithombo yalo engaphakathi kwiBucs ukuthi le kilabhu ihlela ukukhomba indlela uSiyabonga Mpontshane ( osesithombeni) noWayne Sandilands okuvela ukuthi baphelelwa yizinkontileka nale kilabhu uma kusongwa isizini.
Kuthiwa le kilabhu ifuna ukudedela laba onozinti nje, yingoba ifuna ukuphendlela indawo onozinti abasha exoxa nabo. Kuthiwa okwamanje isazama ukuheha uDarren Keet weBidvest Wits ukuba azoyijoyina.
IWits isanda kuphumela obala ngokuthi uKeet wenqabile ukwelula inkontileka yakhe nale kilabhu, yathi uthe uyahamba uma kuphela isizini.
“IPirates iyamfuna uKeet, inkinga wukuthi imbanga nenye ikilabhu yaphesheya kodwa kwayona kayikamsayinisi.
“Cishe kuzocaca ngelizayo ukuthi iPirates iyamthola yini noma cha. Uma ingamtholi ukhona omunye unozinti wakuleli ezoqala imzingele,” kusho umthombo.
Imizamo yokuthola uSihlalo weOrlando Pirates, u-Irvin “Iron Duke” Khoza, okunguyena ozisayinisela abadlali kule kilabhu, ukuba aphawule ngalolu daba, iphunzile njengoba ucingo lwakhe belukhala kodwa lungabanjwa.
Leli phephandaba lithole ukuthi ubebambeke emhlanganweni omqoka ngesikhathi sokuloba. Nokho uKhoza uke waphumela obala kuleli phephandaba phambilini ngokuthi umatasa uthungatha unozinti oseqophelweni eliphezulu. Ukhalile ngokuba yindlala konozinti kuleli.
Imidlalo ye-Absa Premiership ehlelelwe ukugijinywa ngempelasonto iqhathwe kanje:- KUSASA NGOLWESIHLANU ENelson Mandela Bay Stadium: Chippa United vs Golden Arrows 20h00 (SS4).
Polokwane City vs Kaizer Chiefs 15h30 (SS4).
Cape Town City FC vs Maritzburg United 15h30.
Bidvest Wits vs Mamelodi Sundowns 18h00 (SS4).
Orlando Pirates vs AmaZulu FC 20h15 (SS4).
SuperSport United vs Baroka FC 20h15.
EThohoyandou Stadium: Black Leopards vs Highlands Park 15h30 (SS4).
Bloemfontein Celtic vs Free State Stars 15h30 (SS10).