Izinsolo zosizi emendweni kaZimdollar
Kuthiwa umyeni uselobola omunye
IZINKINGA zothando kuthiwa yizona ezishaye phansi umsakazi woKhozi FM, uZimiphi “Zimdollar” Biyela ( osesithombeni), oquleke e- studio oKhozini FM, eThekwini, ngoMsombuluko ekuseni.
ILANGA lithole ngemithombo yalo ukuthi uZimdollar unengcindezi yokuthi umyeni wakhe, uMnu Sibongeleni “Mfishimfishi” Dlamini, uselobole omunye wesifazane ozokuba ngumnakwabo. Kubikwa ukuthi le ngcindezi yenze ukuba uZimdollar athwale kanzima njengoba ubengahambisani nokwelanywa, waze waxabana noMnu Dlamini.
Kuvela ukuthi uMnu Dlamini useqalile wayovela ekhweni lakhe elisha, kanti nalona wesifazane, ILANGA elinalo igama lakhe, usehlala khona emzini. “Okumcasule kakhulu (uZimdollar), wukuthi sekukhona umnakwabo esikhuluma njengamanje uganile kwaDlamini, eMzimkhulu. Kasazi-ke isizathu esiholele ekubeni (uMnu Dlamini) athathe omunye ngoba bekungekho okukhombisa ukuthi kukhona ukungaboni ngaso linye othandweni lwabo futhi basabonakala bendawonye,” kusho umthombo.
Kuthiwa uMfishimfishi utshele uZimdollar ukuthi sekumele kutholakale inkosikazi encane ngoba uzimisele ngokuthatha isithembu. Ethintwa uMnu Dlamini, uthe akakwazi okukhulunywa ngakho, wathi imithombo ikhuluma iphutha.
“Konke lokho kusha kimina, ngiqala ukuyizwa ngawe leyo ndaba. Mina nje ukugula kwakhe kungimangazile futhi kungethusile ngoba akekho umuntu obekulindele. Ngizothola ithuba lokuhlala phansi naye ngithole ukuthi yini inkinga,” kusho uMnu Dlamini.
UZimdollar uthi kazikho izinkinga phakathi kwakhe nomyeni wakhe. Uvumile ukuthi ukhona owesifazane osemzini wakwaDlamini, wathi kodwa yisisebenzi.
“Izinkinga enginazo ezokubhekana nomndeni wami ngezidingo zawo njengoba kuyimina owusizo kakhulu kuwona, nanokuthi-ke phambilini ngisebenze kakhulu ngesikhathi kuqoshwa umdlalo kamabonakude, iHostela.
"Bekudingeka ukuba ngiphume emsebenzini ekuseni ngiphinde ngiyoshutha, bengimatasa kakhulu. Ngakho-ke umzimba uthwale kanzima kakhulu, wangakuthola ukuphumula,” kusho uZimdollar. Lo msakazi uyayichitha eyokuba nezinkinga emendweni nje, omunye umthombo osondelene nalolu daba, ukufakazile ukuthi impela luyiqiniso olwentokazi emelamayo emendweni.
Echaza ngokwenzekile ngesikhathi kwehla lesi sigameko uZimdollar, uthi uzizwe ephelelwa ngamandla, wazitshela ukuthi ubanjwe wubothongo, kodwa engozeli. Uthi ibingekho ingcindezi enkulu kulezi zinsuku, kumethusile naye ukugula kwakhe ngoba ubengaphathekile kabi emoyeni.
“Ngivele ngezwa umzimba ushona phansi, ngathi ngiyasukuma ngiyofuna amanzi ukuze ngizogeza ubuso, ngavele ngawa phansi okunye okwenzekile angikukhumbuli ngoba ngiphaphame esibhedlela,” kusho uZimdollar.
Uthi mhlawumbe ukuba akufikanga ithimba labezindaba, ngabe kukhulunywa okunye ngempilo yakhe. Lo msakazi uquleke e- studio esakaza uhlelo lwakhe olubizwa ngokuthi "Kwasa Okungaliyo” olungena ngo-02h00 kuya ku-04h00. Kuthiwa utholwe yithimba labezindaba ebelizongena ngo-05h00.
Ngokuthola kweLANGA, isimo sakhe besibucayi kakhulu ngoba ubesephuma amagwebu ngomlomo, kungasezwakali muntu emoyeni sekudlala umculo wodwa. Uveze ukuthi akekho umuntu amsolayo ngalokhu okwenzekile. Njengamanje uselashwa esibhedlela esezimele eThekwini.