UFUNA UKONDLIWA NGO-R200 000 UMPISANE
Inkosikazi isifake incwadi yesehlukaniso
UMNU Sbu Mpisane ehleli nomkakhe, uShauwn Mpisane, uMaMkhize. Kuvele emaphepheni aseNkantolo eNkulu yaseThekwini izolo ukuthi ufuna ukondliwa ngumkakhe, ngo-R200 000 ngenyanga kwazise uhola u-R559 000 ngenyanga. UNkk Mpisane ufake isehlukaniso nomyeni wakhe.
UFUNA inkosikazi yakhe esifake incwadi yesehlukaniso enkantolo, imondle ngo-R200 000 njalo ngenyanga usomabhizinisi waseThekwini, uMnu Sbusiso Mpisane, ngokomthetho oganwe nguNkk Shauwn Mpisane, uMaMkhize.
Lokhu kuvezwe ngummeli kaMnu Mpisane, u-Adv Mxolisi Nxasana, eNkantolo eNkulu yaseThekwini izolo ngoLwesithathu, phambi kweJaji Rashid Vahed, kanti obemele uNkk Mpisane ngu-Adv Shane Dayalse, obejutshwe yinkampani yabameli bakaMnu Manaj Maharaj.
Lolu daba - bobabili osingaye abebengekho ludingidwa enkantolo - luchithiwe yiJaji Vahed ngezizathu zokuthi bobabili abameli bakhombise ukuthi b e bengakahlangani babonisane ngamaphuzu athile.
Ijaji liqale labathethisa, libabuza ukuthi bebengahlangani ngani ngaphambi kokuya enkantolo njengoba lolu daba bese lwaziwa nakwabezindaba, lusematheni.
U-Adv Nxasana ukhale ngozakwabo wathi umnike amaphepha ngoLwesine ntambama, kanti u-Adv Dayalse utshele inkantolo ukuthi kuningi akubona emaphepheni kammangalelwa, njengalokhu kokuthi usefuna ukondliwa ngemali engaka.
Yilapho-ke ijaji libabuze khona ukuthi ngabe lolu daba luyaphuthuma yini, bobabili bathi kaluphuthumi, labe selilu-hlehlisela usuku olungaziwa.
Ekhuluma nezintatheli u-Adv Nxasana, uthe amumele uyaphikisana nesehlukaniso ngoba usakholwa wukuthi izinto zisengalungiseka phakathi kwakhe nomkakhe.
"Ummangali ubeka amaphuzu okuthi umyeni wakhe uyaphinga, nathi sinawo amaphuzu esizowabeka esibona ngawo ukuthi izinto zisangaphinde zilunge, uqhubeke lo mshado. Uphinde futhi akhulume ngokwabiwa kwefa nezindleko zecala, okuyinto okumele sibonisane ngayo ngaphambi kokuba kuyiwe enkantolo.
"Phela lo mshado esikhuluma ngawo uhlanganise ifa," kusho u-Adv Nxasana.
UMnu Mpisane owayeyiphoyisa kuMasipala weTheku, wamangalisa abaningi esephenduka injinga emuva kokushada noMaMkhize, bephila impilo yomntakabani. Kamuva nje indodakazi yabo, uSbahle, engazalwa nguMaMkhize, isinde engozini yemoto.