BEZIBUYA EMKHOSINI WOMTHAYI
KUQHAKANJISWE ezobuciko namasiko emcimbini waminyaka yonke obizwa ngeMthayi Amarula Festival, obuseMfihlweni, eManguzi ngoMgqibelo.
Le festival ebisiyenzeka okwesi-9 kulo nyaka, ihehe izinkumbi zabantu ebeziqhamuka ezinkalweni ezahlukene zakuleli nasemazweni angomakhelwane okubalwa iMozambique neSwazi- land. Amaqembu abevela emazweni ahlukene, agabise ngamasiko awo njengoba abevunule ngokwamazwe awo. Abantu abebekulo mcimbi bakuthokozele ukuwabona (amaqembu) eviliyela.
Le festival iqale ekuseni ngezigodi ezahlukene zihambisa utshwala bamaganu enkosini yesizwe sakwaTembe, iNkosi Mabhudhu Tembe. Bezingaphezulu kuka-40 izigodi ezingaphansi kwenkosi ezilethe lobu tshwala obuqhamuka esitshalweni esitholakala kule ndawo.
Ngaphandle kwezinkulumo ezethulwe yinkosi nezikhulu ezahlukene, abantu baphinde bathokozela amanoni abeqhululwa ngabaculi abehlukene okubalwa kubona uMehluko, uBuselaphi, uZero Khumalo, uKhuzani noDJ Tira ovule umcimbi ededela umculo we'gqom' kanti umsakazi woKhozi FM, uKhathide "Tshatha" Ngobe ubengumphathi wohlelo. Le festival ibihlelwe wubukhosi bakwaTembe ngokubambisana nomnyango wezokuThuthukiswa koMnotho nezokuVakasha nohlaka iKZN Tourism.
Khona manjalo umcimbi weafter party obuseHippo Lounge, eKosi Bay, ube nokuphazamiseka ngenxa yemvula nokuphela kukagesi. Nakuba kube nokuphazamiseka, kodwa abathandi bobumnandi abaphelanga umoya, abanye bazihlalele ezimotweni, abanye baqhubeka nenjabulo kwaze kwabuya ugesi.
Kwi- after party bekuboshelwe oDJ okubalwa kubona uTerrence, uNzwiri, u-Amenisto nabanye.
Lo mcimbi buhanjelwe nangosaziwayo bakamabonakude okubalwa kubona uNeliswa Mchunu odlala indawo kaFikile kuZalo, uNokxy Mabika obedlala ekaThobile emdlalweni ofanayo noDeka Mchunu odlala ekaSne kwiSithembiso.