UKodwa ezinsolweni zecala lokudlwengula
Usolwazi uthi wumkhuba wabo osopolitiki ukudlala ngocansi
UBONA seyiphenduke insakavukela umchilo wesidwaba eyamacala ahlobene nezinsolo zokudlwengulwa kwabesifazane ngosopolitiki abahlonishwayo eNingizimu Afrika, umhlaziyi wezepolitiki, uSolwazi Bongile Mayaba.
Lokhu ukusho engxogxweni ekhethekile abenayo neLANGA emuva kokusabalala kwezinsolo zokuthi kunowesifazane osola uMnu Zizi Kodwa, oke wakhulumela i-ANC kuzwelonke, ngokuthi umdlwengulile.
Kuvela lezi zindaba nje, bekusanda kuvela ukuthi uMnu Pule Mabe, okhulumela i-ANC, usolwa ngokuhlukumeza ngokocansi uNkz Kgoerano Kekana (26), obesebenza eLuthuli House, okuyikomkhulu laleli qembu. Kuyimanje uNkz Kekana, oyilungu le-ANC, ukhala ngokuthi akenelisekile ngendlela iqembu lakhe elisingathe ngayo lolu daba, kwazise likhiphe phambili uMnu Mabe.
USolwazi Mayaba uthi i-ANC inenkinga yokuthi abantu bayo bashayana bodwa, uma behleli emihlanganweni yabo badingida ukuthi ngesikabani isithunzi abazosidicilela phansi.
“I-ANC kumele ibe nomgomo wayo oqondile ngezindaba zokuhlukunyezwa ngokocansi kwabantu besifazane. Ngaphezu kwakho konke lokho, kumele iqeqeshe abaholi bayo ngezinto eziphathelene nokuhlukunyezwa kwabesifazane ngokocansi ukuze kuzonqandeka lezi zinkinga ezibonakala sengathi ziyayilandela.
“Wumkhuba wabo osopolitiki ukuthi badlale ngocansi, uma kuthiwa bahlangene kunezingqungquthela ezinkulu, kusuke kudlalwa ngocansi,” kusho uSolwazi Mayaba.
Uthi kuthatha isikhathi ukuba umuntu wesifazane ayihlaziye into esuke imehlele, ikakhulukazi uma ephoxwe ngumuntu omkhulu amethembayo. Lokhu uthi ukusho ngoba kunabantu asebebuza ukuthi lona wesifazane osola uMnu Kodwa, ubethuleleni sonke lesi khathi engaphumeli obala ngokudlwengulwa kwakhe.
“UMengameli Cyril Ramaphosa enkulumeni yakhe ebhekiswe esizweni ( state of the nation address), uyibalulile indaba yokuhlukunyezwa kwabesifazane, wathi kumele ingabukelwa phansi, lokhu kungaba ngenye yezinto ezibuyise ithemba kulo wesifazane wanquma ukuphumela obala ngokudlwengulwa kwakhe ngusopolitiki ohlonishwayo kuleli. Le nto isiwumkhuba ojwayelekile kosopolitiki abahlonishwayo, okubi nje zigcina ziphelele emoyeni lezo zinsolo,” kusho yena.
Esitatimendeni sikaMnu Kodwa, eziphendulela ngalezi zinsolo, uziphikile wathi konke lokhu kuwumdlalo ongcolile wepolitiki, umuntu owenze lokhu uzama ukudicilela phansi isithunzi sakhe.
Uveze ukuthi lolu daba useludlulisele kwabomthetho. Uthi ngeke akuthole ukuphumula enga- katholi ngomsuka wakho konke lokhu.
Ukusho lokhu ngemuva kokuba uNkk Jessie Duarte, oyisekelanobhala le-ANC, ekuqinisekisile esigcawini nabezindaba ngoMgqibelo ukuthi bayitholile incwadi yesikhalo esimayelana nezinsolo zokudlwengulwa kowesifazane nguMnu Kodwa, okuthiwa senzeke ngoMbasa (April) nyakenye.
ILANGA lishayele uMnu Dakota Legoete, osabambile ekukhulumeleni i-ANC, ukuzwa ukuthi njengeqembu bami kuphi ngalezi zinsolo.
Ucele ukuthunyelelwa inombolo yombhali wodaba ukuze ezomthumelela isitatimende esibhaliwe ngoWhatsapp, kodwa kuze kwashaya isikhathi sokuloba engaphendulanga.
Kuzokhumbuleka ukuthi ngo-2005, uMnu Jacob Zuma ngaphambi kokuba abe ngumengameli we-ANC nezwe, wake wabekwa icala lokudlwengula uNkz Fezeka Khuzwayo - owaduma ngelikaKhwezi, ukumvikela - nokho iNkantolo eNkulu yaseGoli yalichitha leli cala ngoNhlaba (May) 2006.