"ABAFUNDI BASHAYE OTHISHA NGAMATSHE"
'BAQHULULE othisha ngamatshe' abafundi baseMziwamandla High School, eMlazi, bebasola ngokumpimpa owesilisa okuthiwa ungene kulesi sikole nezidakamizwa ngoLwesine - okusolakala ukuthi ubeyozidayi-sela abafundi.
Umsolwa okubikwa ukuthi uxoshwe kulesi sikole ngo-2017, efunda uGrade 10, uxhakathiswe ngamaphoyisa efake umfaniswano wakulesi sikole, okuholele ekubeni idlanzana labafundi libhodlele kothisha, kwajikijelwa izimoto zabo ngamatshe.
ILANGA liye kulesi sikole ngoLwesihlanu, lafika abafundi bengekho, kanti iziphathimandla zesikole zona bezisemhlanganweni, zidingida lolu daba. “Isimo sibi. Othisha bathi ngeke babuyele esikoleni le nkinga ingalungisiwe ngoba ubugebengu budlangile kulesi sikole.
"Akusikho okukuqala lesi sikole siba nenkinga yezidakamizwa njengoba kuke kwaba khona omunye umfundi obanjwe nensangu esikhwameni. Ziningi izinkinga ezikhungethe lesi sikole njengoba nonogada bengekho, kungena noma ngubani ngaphakathi.
"Othisha kabaphephile,” kusho umthombo. Umzali womfundi waseMzwamandla, ongathandanga ukudalulwa igama lakhe, uthe: “Kugcwele opotsho kulesi sikole, abafundi ubathola bechanasa ngaphandle ngesikhathi sokufunda. Sikhathazekile singabazali ngesimo sokuphepha ngaphakathi esikoleni ngenxa yezidakamizwa.”
Usihlalo wesigungu esilawula isikole, owale waphetha negama lakhe, uthe umsolwa akasafundi kulesi sikole, uxoshwe ngo-2017 ngenxa yokuhlupha.
“Yize besinomhlangano ngoLwesihlanu, kodwa kasikho isinqumo esiphume naso. Siyethemba ukuthi uma sihlangana futhi namhlanje (ngoMsombuluko) kukhona isinqumo esizothathwa mayelana nokuthi baqondiswa kanjani abafundi abangaziphethe kahle esikoleni.
"Namhlanje ukufunda kuzoqhubeka njengenjwayelo,” kusho usihlalo. UMnu Kwazi Mthethwa okhulumela uMnyango wezeMfundo KwaZulu-Natal, ukushayele ihlombe ukusebenza kwamaphoyisa ngokubamba umsolwa.
“Umnyango kawuhambisani nabafundi abaziphatha ngalolu hlobo ezikoleni. Amaphoyisa enze umsebenzi oncomekayo. Sithi mawaqhubeke, ababophe nabo othisha uma beya nezidakamizwa esikoleni,” kusho yena.
Okhulumela amaphoyisa KwaZulu-Natal, uCapt Nqobile Gwala, uthe basalinde umbiko ovela esiteshini samaphoyisa aseMlazi ngalolu daba.