Kudutshulwe ingane yafa kubhikishwa
Umphakathi usola amaphoyisa
UYAVEVA yintukuthelo umphakathi wasePepeni, eMount Ayliff, e-Eastern Cape, osola amaphoyisa ngokudubula umfanyana okuthiwa ubelusile ngesikhathi kunombhikisho, umphakathi ukhononda ngohlelo lokwakhiwa kwezindlu okuthiwa sekuphele iminyaka ubanjiswe udonga ngazo.
ILANGA lithole ukuthi uThabo Nomake (15) udubuleka nje, kakuqali ukuba kuphume umphefumulo uma kunombhikisho kule ndawo njengoba ngonyaka odlule kudutshulwe uMnu Baxolile Jakuja washona, nakhona kusolwa amaphoyisa.
“Ngonyaka odlule sabhala incwadi siwumphakathi sayisa kumasipala wethu ngodaba oluthinta izindlu. Kuhambe isikhathi singaphendulwa ngaleyo ncwadi, umphakathi wabhala enye, nakhona yangaphendulwa.
“Kube sekuthathwa isinqumo sokuba kuvalwe imigwaqo. Kungaleso sikhathi amaphoyisa afike adubula amalungu omphakathi, kwashona uMnu Jakuja. Zifikile iziphathimandla zikamasipala zasitshela ukuthi izindlu ezizokwakhiwa ziwu-500 kuphe- la, sacela ukuba zengezwe ngoba baningi abantu abangenazo izindlu. Siyalelwe ukuba sibhale enye incwadi enaleso sicelo, sathenjiswa ukuthi izophendulwa kodwa kwangenzeka lokho.
“Ngeledlule umphakathi uphindele emgwaqweni uyobhikisha ngoba kucaca ukuthi kabukho ubulungiswa odabeni lwethu oluthinta izindlu. Nakhona kulokhu, kuphinde kwadutshulwa ingane encane ebingeyona ngisho ingxenye yombhikisho,” kusho ilungu lomphakathi.
Uyise kaThabo, uMnu Delani Nomake, uthe bewumndeni basadidekile ngokubulawa kwendodana yakhe. Uthe izingane bezingayile esikoleni njengoba bekunombhikisho, indodana yakhe ibithunywe esitolo.
“Uthe uma efika esitolo nabehamba nabo, bathola ukuthi kuvaliwe njengoba bekunombhikisho. Ube esebuyela ekhaya, okuthe besendleleni bahlangana nelungu lomndeni liqhuba izinkomo. Balilekelelile baliqhubisa izinkomo. Uma sizwa, kungaleso sikhathi kuqhamuke khona amaphoyisa avulela ngenhlamvu, uThabo wadubuleka ekhanda. Uphuthunyiswe esibhedlela okuyilapho ashonele khona,” kusho yena.
Ikhansela laku- ward 1, uMnu James Hem, lithe ngokombiko othunyelwe yiziphathimandla zoMnyango wezokuHlaliswa kwaBantu e-Eastern Cape, kayikabi khona imali yokuba kuqalwe uhlelo lokwakhiwa kwezindlu kule ndawo.
Odabeni lokudutshulwa kukaThabo, uthe banethemba lokuthi uma sekuhlonzwa isidumbu inhlamvu izoveza ukuthi ngubani odubulile njengoba kunemibiko ethi ngamaphoyisa kaMasipala waseMzimvubu.
Okhulumela amaphoyisa aseEastern Cape, uCol Sibongile Soci, uthi bazobambisana neIndependent Police Investigative Directorate (Ipid) ngophenyo lwayo ngecala lokubulala elivulwe eMount Ayliff emuva kombhikisho.
Imizamo yokuthola uMnu Lwandile Sicwetsha, okwezokuxhumana eMnyangweni wezokuHlaliswa kwabantu, e-Eastern Cape ayiphumelelanga njengoba ucingo lwasehhovisi belukhala lungabanjwa kanti kuMasipala waseMzimvubu, uMnu Sobane Mnukwa, ongusomlomo, unxuse leli phephandaba ukuba lixhumane nokhulumela umasipala, nokho uzanyiwe kodwa lutho ukutholakala.