BAJABULE KWESULA ISIKHULU SIKAMASIPALA
KWENZIWE isiphihli sedili, kwaqhuma amashampeni emuva kokwesula kobeyimenenja kaMasipala waseMzumbe, osomabhizinisi bendawo bethi liphume nobovu.
UNkk Nokuthula Mgijimi ( osesithombeni) ufake incwadi yokwesula ngesonto eledlule emuva kokuphuma kombiko weMunicipal Public Accounts Committee (MPAC) ongemuhle, onegama lakhe, othi uhola kakhulu ngokungemthetho. Iholo lakhe lisuke ku-R951 779 00 laya ku-R1 042 196.04 ngonyaka, kusukela mhla lulunye kuNtulikazi (July ) wangonyaka odlule.
Ngokwalo mbiko, uNkk Mgijimi bekufanele abuyise u-R332 431.01 awuhole ngokungemthetho. Osomabhizinisi bendawo bafake isimangalo eMnyangweni wezokuBusa ngokuBambisana nezoMdabu KwaZulu-Natal, befuna uNkk Mgijimi aphenywe ngamathenda athile.
USihlalo weMzumbe Chamber of Business, uMnu Senzo Ngcobo, uthe bengosomabhizinisi bahluleke nawukuzibamba yinjabulo, babona kungcono benze isiphihli sezoso, bakhombise indlela abajabule ngayo ngokuhamba kukaNkk Mgijimi kulo masipala. “Akekho la kosomabhizinisi abangaphansi kweMzumbe Chamber of Business othi ubejabule ngendlela (uNkk Mgijimi) ebephethe ngayo,” kusho uMnu Ngcobo. IMeya yaseMzumbe, uMnu Sizwe Ngcobo, ikuqinisekisile ukuthi bayitholile incwadi yokwesula kukaNkk Mgijimi ngoMsombuluko, ebithi useyagcina mhla ka-22 obungoLwesihlanu. “Kazikho izizathu azibekile ngokwesula kwakhe encwadini, ngaphandle kokuthi athi uyabonga, usebenzisane kahle nathi. Yize lukhona uphenyo olwenziwa wumnyango ngomasipala, kodwa ngeke ngisho ukuthi isizathu sokwesula kwakhe ngabe yilokho yini. “Engingakusho nje wukuthi siwumkhandlu (kamasipala) sesihlalile, sakwemukela futhi ukwesula kwakhe. Sizokhipha isikhangiso somsebenzi siqashe imenenja entsha maduze nje,” kusho uMnu Ngcobo. Ebuzwa ngezindaba zokwesula kwakhe, uNkk Mgijimi uthe usule ngezizathu zakhe, ezithinta yena nomndeni wakhe. “Angihlangene nokuthi osomabhizinisi bebejabula ngokwesula kwami ngoba kangiqashwanga yibona ngiqashe umasipala,” kusho uNkk Mgijimi. Mayelana neholo lakhe, ubhoke ngolaka wathi: “Wena ubufonele ukwazi ngezizathu zokwesula kwami ngakutshela. Lento osungitshela yona angiyazi. Kungani ungafoneli okhulumela umasipala.” Kuzokhumbuleka ukuthi ngokuphela konyaka odlule lo masipala uke waba sematheni, osomabhizinisi bendawo bevale thaqa amahhovisi cishe amasonto amabili wonke kungasetshenzwa ngoba bekhala ngaye uNkk Mgijimi. Kuvele nowesifazane obeneminyaka ewu-19 ubudala othe ununuselwe ngesigidi sonke samarandi ukuba azidlise satshanyana kuMnu Ngcobo ukuze alale naye bese emvulela icala lokudlwengulwa. Ngokusho kukaMnu Ngcobo, lona wesifazane akasekho kulo masipala, ukhonjwe indlela emuva kokuveza lezi zindaba.