BAVUSELELWE NGAMAZWI OTHANDO
BAPHUME kubuhlungu izisu w u k u h l e k a emcimbini kasomahlaya uSkhumba Hlophe. Lo mcimbi obuyizolo ngoMgqibelo, ububizwa ngokuthi Skhumba Hlophe Live “#Mean Bizniss”. Ubuse Suncoast ehholo elikhulukazi elibizwa ngeThe Globe. Noma abantu bengagcwalanga njengoba bekukhona izihlalo ebezingenamuntu, kodwa bebephume ngobuningi. Bekuqhululwa amahlaya ahlukene kodwa njengokujwayelekile athinta ezokuthandana, nanocansi awazange asale ngaphandle. Kuphinde kwahlekiswa nangesikhungo sezemfundo ephakeme, uNgoye kuthiwa luphisana ngeziqu. Nabantu abakhonze ukuhlala phambili nabo baphendulwe inhlekisa kuthiwa bahamba nomakhwapheni.
USindi Mnguni ongumgqugquzeli walo mcimbi, ekhuluma nethimba naleli phephandaba, uthe bajabule kakhulu ngokwesekwa abakuthole eThekwini.
Uthe ngaphambi kokuba kuphele unyaka kukhona omunye umcimbi abazowuletha khona (eThekwini). Phakathi kosomahlaya abashiyelane inkundla kubalwa uMpukane, uSihle Mthethwa, u-Isaac Ngampu naye uSkhumba Hlophe. UBASHIYE besafuna impinda abantu uSgwili Zuma ongumculi we- gospel, izolo ngoMgqibelo eNdwedwe, ehholo likaMasipala, iJohnny Makhathini lapho bekwenzelwe khona umcimbi wezithandani.
Lo mcimbi ubuhlelwe yiqembu elizibiza ngeThandolwethu. UMsholozi utheleke kulo mcimbi sekushaye ihora lesibili ekubeni ubelindwe ngo-12h00. Uthe efika waxolisa ngokuthi ubehlushwa yimoto maqede wadedela amanoni ezingoma zakhe, abantu bajabula,bakhohlwa nokuthi ufike sekudlule isikhathi.
Phakathi kwezingoma ajabulise ngazo abantu singabala ethi: "Wonderfully Blood", "uJesu Wehla", "Umhlatshelo" nethi "Mphefumulo wami" ukubala ezimbalwa nje.
Lo mcimbi uba minyaka yonke, bese kungokwesithathu wenzeka. Abantu bebephume ngobuningi bezolalela amazwi abavuselelayo othandweni.
Abefundisi abebeshiyelana inkundla kubalwa uMfundisi Musa Madlala noHlengiwe Dlamini, bebesho ngazwi linye ukuthi emshadweni yindawo yokubekezelelana kuphinde kujatshuliswane.
UZakhe Luthuli ongusihlalo weqembu iThandolwethu, ubonge bonke abantu ebafikile emcimbini, wathi isandla sidlula ikhanda. Uphinde wabonga noMasipala waseNdwedwe ngokubalekelela ukuze lo mcimbi ube yimpumelelo kanye neNdayi.