UShenge uphefumula ngeSona
Ukhathazwa nawukuthi izovelaphi imali yokufeza zonke izinto ezishiwo ngumengameli
NGOKWENQUBO yokusebenza kwephalamende, amaqembu aphikisayo aba nethuba lokuphawula ngokushiwo ngumengameli enkulumeni yakhe ebhekiswe esizweni, i- state of the nation address (Sona) ngolwasemzini.
INkosi Mangosuthu Buthelezi, engumengameli we-IFP, nakhu ekushilo maqondana nenkulumo kaMengameli Cyril Ramaphosa:
“Kube yiminyaka eyisishiyagalolunye obengumengameli eza kule ndlu asitshele ukuthi mkhulu kangakanani umsebenzi owenziwa wuhulumeni. Igebe eliphakathi kwayekusho neqiniso elaziwa yithina sonke, likhulu kakhulu. Ngakho-ke, mengameli, eyakho indlela ibiheleza umoya omusha ovuselelayo.
Esikhundleni sokusitshela ukuthi mkhulu kangakanani umsebenzi owenziwa wuhulumeni, usitshele ukuthi mkhulu kangakanani umsebenzi okumele uwenze. Izinhloso okhulume ngazo ngoLwesine oludlule azinaphutha ndawo.
Siyathanda ukuba sikholwe wukuthi zonke zingenzeka nokuthi zonke zizofezwa, kodwa uma kumanje nje sesiboleka imali ukuze singashoni phansi, izophumaphi inkece yokwenza zonke lezo zinto? Kubukeka sengathi amathemba ethu siwenyusele emazingeni aphezulu ngokungakaze kwenzeke emlandweni wezokutshala imali.
Ingabe labo batshalimali bazokuza? Sihlose ukuba yizwe elenza kahle ezingeni lomhlaba ngokwamazwe esifuna ukusebenzelana nawo kodwa uma siphezulu kangaka ezilinganisweni zenkohlakalo, abatshalimali bazoba nethemba kanjani? Sidinga ukuba batshale imali manje kodwa sibe sisezingeni eliphansi kunabo bonke?
Nxa kuza kwezomnotho, intatheli, uClaire Bisseker, ichaza kahle kwiFinancial Mail yangesonto elidlule. Ibhale kanje: 'Emuva kokugingqa umgqomo siwubhekise ezansi nomgwaqo, kubukeka manje iNingizimu Afrika isifike ekupheleni komgwaqo'. Umnotho wethu ubungabhekene nenzikamnotho ngokwezinombolo, mhlonishwa, ubuholi obebuyinsambatheka, yinkohlakalo nokuthunjwa kombuso ( state capture) yikho okudale le nzikamnotho.
Akwehlanga obekungalindelekile futhi obekungabonakali, sizigwaze ngowethu, ngakho-ke siyakuqonda ukuvuma kwakho ukuthi ngaphansi kobuholi beANC, izinto ziye zanhlanhlatha kakhulu. Impela sekubekhona ukungethembani phakathi kwabantu nohulumeni wabo futhi izidingo zabahlwempu, abangaqashiwe, abanganakiwe nabaphuciwe konke sekulitshelwe ngazo.
Mengameli, ufuna sikholwe wukuthi konke okushilo ngonyaka odlule akusekho nokuthi manje konke sekuguqukile? Yini manje esiyehlukile nge-ANC ukuba ngokushesha yenze izinto ezisobala obekudingeka zenziwe sonke lesi sikhathi? Izixazululo okhulume ngazo kaziyona into ecashile.
Kuliqiniso khona ukuthi kumele sikhiqize impahla edingwa ngamanye amazwe, kuliqiniso ukuthi kumele sigxile emikhakheni ezokwenza kuqashwe abantu abaningi, njengezolimo, kuliqiniso ukuthi kumele siwusebenzise umhlaba kahulumeni ongasebenzi okhona ukuba kwakhiwe izindlu futhi kulinywe, kuliqiniso ukuthi kumele sibheke udaba lwezinkampani zikahulumeni.
Sekuyiminyaka ngeminyaka Inkatha Freedom Party ikusho lokhu. Usitshelile mhlonishwa ukuthi 'uhlela ukwenza izinto ngokwehlukile‚' nokuthi ufuna sikholwe wukuthi kulezi zinyanga eziwu-12 ezidlule usuzenzile izinto ngokwehlukile.
Imisebenzi? Kwaba nengqungquthela. Ezempilo? Kwaba nengqungquthela. Udlame lobulili? Kwaba nengqungquthela. Akumangalisi-ke uma ukuqikelela ukuba ugcizelele ukuthi ingqungquthela yokutshala imali ayisikho ukukhuluma nje.
Ngiyazikhumbula izinkulumompikiswano zikahulumeni wethu wentando yeningi ngenkulumo kamengameli ebhekiswe esizweni. Thina emaqenjini aphikisayo sexwayisa kaningi ngaleso sikhathi ukuthi izingqungquthela nemihlangano akwenele, okwabe kudingwa yiNingizimu Afrika wukwenza izinto eziphathekayo.
Uma kuwukuthi siqala phansi noma siqhubeka lapho sigcine khona eminyakeni eyishumi eyedlule, masilalele isexwayiso esingasinakanga ngaleso sikhathi.
Ukukhuluma kumane kuba wukukhuluma nje, sibonise ngokwenza. Kwenzeka kanjani ukuba kuthathe iminyaka ewu-24 ukubona ukuthi izikole eziwu-4 000 zinezindlu zangasese ezingaphephile? Lokho kusho izingane ezingaphezulu kwezigidi ezimbili ebesikhohliwe ngazo nxa kuza ekudaleni isimo sempilo enesithunzi.
Sitshela lezi zingane ukuthi imfundo iyisihluthulelo sengomuso lazo kodwa izikole zazo kazinazo ngisho izindlu zangasese? Uma lokhu kuyiyona mpumelelo yeminyaka ewu-25, kunzima ukukholwa wukuthi eminyakeni ewu-6 kusukela manje, bonke abafundi bazobe besebenzisa ama- tablet nezincwadi zobuchwepheshe bamakhompyutha. Kuzwakala kahle, kodwa ngabe kuzokwenzeka na?
Umuntu uyalingeka ukuba akukholwe okushiwoyo ngenxa yokuba siyisizwe esimangalisayo futhi abantu bakithi bayabekezela.
Sifike ekugcineni nezethembiso ezingagcinwa, sesilahliswe ithe- mba kaningi. Uma manje usithembisa ilanga, inyanga nezinkanyezi bese wehluleka wukwenza, iNingizimu Afrika izovutha amalangabi!
Isizwe sakithi siyabila yintukuthelo enobulungiswa. Nginamahloni njengowomdabu waseNingizimu Afrika ukuthi uhulumeni wethu wehluleka wukwenza ngisho okwakwenziwa wuhulumeni wengcindezelo yobukoloni. Akukho nowodwa umkhandlu wabaholi bomdabu noma indlu yabaholi bomdabu enesabelomali, kepha kumele ‘sibambisane’ futhi sifeze umsebenzi wethu kuhulumeni wasekhaya."
Siyisizwe esimangalisayo futhi abantu bakithi bayabekezela.