MAKUNGAGCWANEKELWA EBANDLENI LETHU LOFAKAZI BAKAJEHOVA
MHLELI: KwelikaZibandlela (December) 27-29-18, ekhasini 10, nivale ngohlevane lwengosi/mbono ka-Abdul Milazi lapho eveza ubuhlungu benhliziyo bokuthi basekhona emhlabeni laba bantu okuthiwa ngoFakazi bakaJehova, yena kade ejabula ethi sebaphela.
OFakazi abakaJehova Milazi, bangoFakazi ngoba uJehova uyabadinga abantu abazomfakazela ngombuso wakhe ozayo (Isaya 43: 10-12), yingakho sikhona nje. OFakazi basebenzisa imibhalo yeBhayibheli lapho befundisa, uma ufuna ukuphikisa nawe sebenzisa lona.
Njengokusho kweBhayibheli: Ukufakaza kusindisa lowo ofakazayo nalowo olalelayo (1Thimothewu 4:16). Yingakho uJesu indodana kaNkulunkulu ayeshumayela ezindaweni zonke, engena imizi nemizana (engabe uyakholelwa yini kuye, angazi) Johan 14:14.
Mhleli njengoba sengishilo, isihloko esikhulu sale ngosi/mbono kaMilazi besithi, “Amakholwa ayinkinga kule nyanga yokuzalwa kukaJesu.” Mhlawumbe angikucacise zisuka nje ukuthi siyakholelwa kuJesu indodana kaNkulunkulu nenhloso yakhe yokuza emhlabeni, kepha thina kasiwugubhi kwaKhisimusi lowo. Sengibhekene nawe Mhleli kulesi sigaba, nginenkinga yalo mbono ngoba ngowomuntu oyedwa obhalwe ngendlela engavamile. Mude ngendlela engajwayelekile bese niwunika indawo enkulu kangaka ukuba abhale. Sekungaba yinkinga esiyoyibona ngesinye isikhathi ukuthi kanti kuleli phephandaba sivumelekile ukuqhamuka nezingosi/mbono ezicokofula amanye amabandla, siwaninde ngendle nomhleli avume kushicilelwe, sibe sithi siyafana, siyalingana. Leli phephandaba selibe phambi kwamehlo ethu isikhathi eside njengoba liyaye lishicilele izindaba ezinohlonze nezibalulelikile. OFakazi benzeni ecasula lo mlisa. Uma ethi uyikholwa kwayena unebandla akhonza/asonta kulo, usebenzisa liphi iBhayibheli? Leli elikhuluma ngoJesu, nemisebenzi?
Ngicela ukukuphendula Milazi ngisebenzisa lona lelo Bhayibheli lakho uma unalo (Isaya 43: 10-12), siphinde sisebenzise lelo Bhayibheli lakho sibheke incwadi kaMathewu 24;14, lithi ukholo kumele luhambisane nemisebenzi ngoba ngaphandle kwemisebenzi lufile. Yingakho sihamba sifakaza siseyimiqemane. Sigwema ukukhetha iNkosi ngoba sesigulela ukufa. (Jakobe 2: 14 no 26). OFakazi bakaJehova kabadayisi ngePhaphama nazo zonke ezinye izincwadi zabo namapheshana abawakhiphayo. Kepha lapho becela umnikelo wokuzithandela, bayasichaza isizathu ukuthi kungenhloso yokunyathelisa ezinye izincwadi. Nakuba kunjalo, uma ungenawo lowo mnikelo, uma uyithanda incwadi yethu sikunikeza ngaphandle kwenkokhelo. Wumbono wami lo, kangikhulumeli ibandla loFakazi bakaJehova.
Impendulo: Yobe Mapholoba ngokukuthunuka. Empeleni lo mbhalo okhuluma ngawo kakuwona nje umbono womuntu esingamazi, yingosi ethi Sigudla noGalakajana, uMnu Abdul Milazi ayiloba njalo ngoLwesine. Usenesikhathi esingangonyaka waqala ukuyibhala. Le ngosi ngeyamancoko, lokhu okubizwa nge- satire ngolokucela izinkobe. Okusuke kushiwo ngababhali bama- satire kuwona wonke amaphephandaba okanye kunoma yimuphi umthombo wezindaba kusuke kuncokolwa, hhayi ukuthi ngempela lowo okukhulunywa ngaye uyahlulelwa noma uyacokofulwa.
Njengephephandaba, siyabahlonipha oFakazi bakaJehova njengoba sihlonipha wonke amabandla, wubulili, ibala, yizizwe, yizinhlangano zezepolitiki, njalo njalo njengomyalelo womthethosisekelo wezwe.