Makulekelelwe ukutakula imboni kashukela kuleli
Umengameli Cyril Ramaphosa kumele athathe izinyathelo ezinqala
ENKULUMENI yakhe ebhekiswe esizweni ( state of the nation address - Sona), uMengameli Cyril Ramaphosa ubeke ngokucacile isidingo sokuba kuthuthukiswe ezolimo ukuze kusizakale bonke abantu.
Nokho, ngendlela engachazeki, akazange asho lutho ngesimo esibucayi semboni kashukela. Nansi inhlabamkhosi kuMengameli Ramaphosa nekhabhinethi yakhe imboni kashukela eNingizimu Afrika ibhekene nenkinga engakaze yaba khona emlandweni wayo.
Le mboni umnotho wayo olinganiselwa ku-R14 billion, isengcupheni yokuphela namathuba emisebenzi awu-350 000 nabantu abayisigidi ebondlayo. Ngaphezu kwalokho, le misebenzi iningi layo isezindaweni zasemakhaya lapho emancane khona amanye amathuba emisebenzi.
Lokhu kulahleka kwalawo mathuba emisebenzi nakanjani kuzoholela ekuthuthelekeni kwabantu emadolobheni. Abalimi bomoba, abalimi abasafufusa, izisebenzi zasemapulazini nomphakathi obazungezile, bazonyamalala uma uhulumeni wehluleka wukwenza okuthile. Ukungaqiniseki ngemvula: Ukuguquguquka kwesimo sezulu sekuholele ekubeni kube nezimo zezulu ezingalindelekile. Isibonelo, izifunda okulinywe kuzona umoba KwaZulu-Natal, zisaphuma esomisweni esithathe iminyaka emithathu esibalimaze kakhulu abalimi bomoba, balahlekelwa yimali engaphezulu kuka-R2 billion ngesizini eyodwa yokulima.
Naphezu kobubi besimo sezulu, kuncane kabi okuwusizo olwanikezwa abalimi bomoba ngesikhathi lomise isikhathi eside kanjalo nangesikhathi sokusimama.
Abalimi bomoba bangene kwenye ingwadla ngesikhathi kungena kuleli izindodla zikashukela olinganiselwa ku-500 000 tons othengwe kwamanye amazwe ngo2018.
Ushukela waseNingizimu Afrika – obalwa nosezingeni eliphezulu emhlabeni jikelele – ududulelwe ezimakethe zamazwe ngamazwe.
Ngaleyo ndlela abalimi bomoba namalungu ezinye izimboni alahlekelwa kakhulu futhi abaningi babo basengcupheni yokuvala amabhizinisi abo.
Uma intengo yomoba ingabi ngcono maduze, baningi abazodilizwa emisebenzini, avale amapulazi, kulahleke imisebenzi eminingi kule mboni. Ngo-2018, kuthathe izinyanga eziningi le mboni izama ukuncenga uhulumeni ukuba unqume intela kushukela ovela ngaphandle ukuze kuvinjwe ukufuhlelwa kwempahla yezinga eliphansi kuleli zwe, ikakhulukazi ephuma eBrazil.
Emuva komzukuzuku kwenziwa izethulo nokunxenxa, abe-International Trade Administration Commission (ITAC) bagcine bevumile ukwenyusa intela ebalwa ngamadollar (DBRP) - okuyintela ekhokhelwa impahla engena eNingizimu Afrika.
Le DBRP igcine yenyusiwe isuka ku-$566 (R7 66.90) iya ku-$680 (R9 518.68) ithani - okungewona u-$856 (R11 982.33) owabe ucelwe yile mboni.
Umphumela walokhu ukuthi abalimi bomoba namanye amalungu ale mboni, bangasakwazi ukubuyisela izindleko zabo zokukhiqiza. Ngaphezu kokungabuyelwa yimali yezindleko zokukhiqiza, abalimi bomoba babhekene nenkinga yokwehla komthamo wokuthengwa komkhiqizo, ikakhulukazi ngenxa yokwehla kwesidingo ezimakethe.
Emuva kokuqalisa kwentela ekhuthaza impilo enhle (ebizwa ngeSugar Tax) ngo-2018, abenzi beziphuzo baqalile ukunciphisa ubukhulu bamabhodlela kanjalo nomthamo kashukela emikhiqizweni. Zonke lezi zinyathelo ziholele ekuncipheni kwesidingo sikashukela, nalokhu kuyehlisile imali engenayo.
Lezi zinselelo uma sezihlangene, zidala isivunguvungu uqobo. Nxa singenzi okuthile, zizoyibulala nya imboni kashukela – ewumkhakha onikela cishe u-R14 billion emnothweni weNingizimu Afrika. I-SA Canegrowers Association inxusa uhulumeni ukuba uthathe lezi zinyathelo ezintathu ukusiza imboni iphume kulesi simo esibucayi:
Awunike imboni intela yokuvikela eyayicelayo ukuze kube nokufana kwesimo kuwo wonke obambe iqhaza, ayivikele emkhiqizweni yezinga eliphansi evela emazweni ayixhasile kakhulu ngemali.
Awuqinise imibandela evimbela ukungeniswa kukashukela ophuma emazweni angomakhelwane wona angakhokhiswa intela yempahla.
Mawutshale imali ezintweni ezisungulwa yimboni, njengokukhiqiza i- ethanol nokokusonga impahla okwenziwe ngomoba ukuze kuxhaswe imizamo yale mboni yokuthola ezinye izimakethe zikashukela. Lokhu okusungulwayo kungadala izinkulungwane zamathuba amasha emisebenzi ezweni.
Ubhekele izinguquko emananini kashukela emhlabeni, uvikele imboni yasekhaya ezinguqukweni zamanani entengo, ngaleyo ndlela kuphephe ingomuso lemboni.
Lena yinhlabamkhosi yokuba kube khona okwenziwayo.
Uma uMengameli Ramaphosa ezimisele ngokudala amathuba emisebenzi awu-275 000 ngonyaka, nangokuba umkhakha wezolimo ungenise imali, udinga ukuthatha izinyathelo ngokushesha zokuba ayihlenge imboni kashukela – ukuze kusizakale bonke abantu.