Babona ipolitiki njengebhodwe eliconsayo
ENYE yezinqinamba esibhekene nayo eNingizimu Afrika, wukuthi iningi lethu, ikakhulukazi osopolitiki, 'lingosiyazi' abacabanga ukuthi bangaxazulula zonke izinkinga zomhlaba.
Uthola umuntu ongakaze abe ngisho ne- spaza lesi, asiphathe ngempumelelo, akhulume aze akhihlize amagwebu, akutshele ukuthi uma ungavotela yena neqembu lakhe, angasimamisa umnotho wezwe, kudaleke namathuba emisebenzi ayizigidi ngezigidi, zonke izakhamizi ziqashwe.
Imbudane uqobo lwayo. Uma singathatha nje umhlahlandlela weqembu elilodwa, i-EFF, omicabango yayo yokuphatha izwe icishe ifane neyalowo owabe engumengameli waseZimbabwe, uMnu Robert Mugabe nomholi waseVenezuela osewashona, uMnu Hugo Chavez, yini enhle ongacabanga ukuthi leli qembu lingayenzela abantu bakuleli?
EZimbabwe u-90% wabantu bakhona kawusebenzi, kanti leliya lizwe kalisenayo ngisho imali yalo ethi lona njengoba lisebenzisa i- dollar lase-USA nerandi lakuleli ukuhweba ngoba umnotho wakhona uwe bhu phansi.
Lokhu kwenzeka ngaphezu kokuba uMnu Mugabe wayetshele abampisholo kuleliya lizwe ukuthi ukuthatha umhlaba wabalimi ngendluzula, kuzoxazulula zonke izinkinga zabo zomnotho.
Kumanje izigidi zabantu baseZimbabwe zigcwele kuleli lakithi nakwamanye amazwe, ziyizinqibi, kodwa zinomhlaba okwakuthiwe uzozenza izinjinga ezweni lazo.
EVenezuela khona babalelwa ku-3 million abantu bakhona asebebalekele emazweni angomakhelwane ngenxa yobubha nokweswela ezweni elinowoyela omningi ukuwedlula wonke amazwe.
Ngaphambi kokuphatha kukaChavez nomlandelile kulesi sikhundla, uMnu Nicolas Maduro, iVenezuela ibingelinye lamazwe acebile eSouth America, abantu bakhona bephila impilo ephezulu uma ubaqhathanisa namazwe angomakhelwane.
Pho yini abanye bakuleli bacabange ukuthi iqembu elibona uMnu Mugabe neZimbabwe noMnu Chavez neVenezuela njengezibonelo ezinhle lingenza okuhle kuleli, likhulise umnotho, kodwa sibe sibona ukuthi amazwe elibonela kuwona asephenduke izinqibi zomhlaba?
Njengoba kuyiwa okhethweni lukazwelonke nolwezifundazwe ezinyangeni ezingaphezu kwezimbili nje, baningi osomathuba nabadukisi abazokwethembisa abantu izulu nomhlaba ngoba befuna ukuzuza amavoti.
Sikhuluma nje, angaphezu kuka-200 amaqembu angenele ukhetho kulo nyaka, okuyinto exakayo ukuthi kungani abe maningi kangaka.
Impendulo wukuthi abanye balaba bantu asebeziqalele amaqenjana abo, abafuna ukuvotelwa nguwe, yingoba babona ipolitiki njengebhodwe eliconsa amafutha.
Inhloso yabo uma bengangena ephalamende nasezishayamthetho zezifundazwe, kakukhona ukufukula abantu baseNingizimu Afrika, kodwa wukuxebula umkhomo emalini yentela yabantu njengoba kade bebona kwenza amalungu eqembu eliphethe, i-ANC, kule minyaka ewu-25 eyedlule.
Umbuzo obalulekile ohlalele umuntu nomuntu onelungelo lokuvota, wukuqaphela ukuthi laba bantu abafuna ukuvotelwa banawo yini umlando wokwakha izinto ezibambekayo ezisimamayo; ngabe bangabantu abaphumelelayo yini uma ubheka umlando wabo?
Kubalulekile ukuba umuntu nomuntu onelungelo lokuvota azibuze ukuthi angamnika kanjani usopolitiki ongakaze aphathe ngisho i- spaza ngempumelelo empilweni yakhe, amandla okubusa izwe lonke, alungise izinkinga zomnotho ezisixakile.
Impendulo efanele yalo mbuzo yilona khambi eliyocacisa ukuba ngabe ngelinye ilanga siyofana neZimbabwe na, noma nezwe eliphumelelayo njengeSingapore.