KUSOLWA UBUTHAKA BEBHENTSHI KWI-KINGS

INDUMALO kuSimo Dladla ongumqeqeshi weReal Kings ecazelane amaphuzu neMaccabi FC kuba ngu-2-2 koweNational First Division (NFD) ngoMgqibelo ntambama eSugar Ray Xulu Stadium, eClermont.

IMaccabi yiyona evule inkundla uCollins “Ntofontofo” Mbesuma elibeka enethini kwathi elinye lezakhe lashaywa nguMokeri Senwamadi. AweKings ashaywe nguSiphiwe “Magolide” Mbatha obekukhona kuwona nephenathi.

UDladla uzwakalise ukuphoxe- ka emuva kwalo mdlalo.

“Ngiphoxekile. Laba bantu sibahlule ngo-4-2 ekuhambeni sesizobambana nabo ngo-2-2 ekhaya. Ngidumele nangendlela esimake ngayo emuva, siyamazi uMbesuma ukuthi unjani, sikhulume kakhulu ngaye kodwa kubukeke sengathi bavele bamuhlonipha bamunika intuba yokudlala.

“Into esibulalayo wukuthi ukusho konke kubadlali okufanele bakwenze kodwa bona bazenzele izinto zabo. Kodwa okumqoka njengamanje wukuthi abadlali kufanele bakhuthazwe ukuze bakholelwe kubona. Indawo esikuyona iyabethusa ngoba abayejwayele.

“Nokho angililahlile ithemba, sizosuka kule ndawo embi esikuyona,” kusho uDladla.

UJoel Masutha ololonga iMaccabi, uthi kuyamethusa ukuthi iKings ibambe ibhuleki emsileni welog.

“Indlela abadlala ngayo akufanele engabe bavika izembe, badlala ibhola elihle kakhulu. Kodwa into engibonile ukuthi ishaya uDladla wukuthi akanaye umsizi oqine ukhakhayi. Ebholeni uyadinga ukuthi uphahlwe ngabantu abaqine ukhakhayi,” kusho uMasutha.