Umasipala uMsunduzi usuzoba ngaphansi komlawuli
Kuthiwa uyehluleka ukuphatha imali ngendlela efanele
ZIYAQINA izinsolo zokuthi uzoqhoqhobalwa ngumlawuli oqhamuka eGauteng, uMasipala waseMsunduzi, osanda kufakwa nguNgqongqoshe wezokuBusa ngokuBambisana nezoMdabu KwaZulu-Natal, uNkk Nomusa Dube-Ncube, ngaphansi kweso lomlawuli emuva kokuba wehluleka ukusebenza ngendlela efanele.
Umthombo weLANGA, uthi uzolawulwa nguMnu Nhlakanipho Nkontwana, oke waphatha njengenhloko eMnyangweni wezokuBusa ngokuBambisana eGauteng.
UMnu Nkontwana kumanje ungumaluleki eMnyangweni wezokuBusa ngokuBambisana kuzwelonke.
UNkk Dube-Ncube uthe lo masipala uze ufakwe ngaphansi komlawuli nje, yingoba uhlulekile ukuphatha imali ngendlela nokuhlinzeka abantu ngezidingo.
“Kunabantu kulo masipala abaqashelwe ukwenza imisebenzi ethile, okuthi uma kuphela inyanga bahambe neholo elihle, kodwa kabanandaba nokuhlinzekwa kwabantu izidingo. Leli dolobha lingcole into exakile.
"Sekucacile ukuthi ubuholi obukhona kulo masipala, kabukwazi ukuphatha ngaphandle kokuba busizwe yisifundazwe noma uhulumeni kazwelonke.
"Lo masipala uke waba nemali elinganiselwa ku-R1 billion ebigcinwe esikhwameni kule minyaka emibili edlule, kodwa okumanje izinto sezivele zaba zimbi kakhulu kunakuqala,” kusho uNkk Dube-Ncube.
Umholi weDemocratic Alliance (DA) KwaZulu-Natal, uMnu Zwakele Mncwango, uthi bayajabula ukuthi ungqongqoshe ugcine efake umlawuli kulo masipala osekunesikhathi bekhala ngawo.
Uthe nokho injabulo yabo kayiphelele njengoba ungahlakazwanga umkhandlu kuqalwe phansi kuvotwe ngendlela okubi ngayo kulo masipala. “Osopolitiki kulo masipala bebezixebulela umkhomo ngamathenda.
"Ngike ngamemezela ukuthi ngizoba nesigcawu sabezindaba lapho ngizodalula khona inkohlakalo komunye umasipala, ngavele ngathola incwadi ephuma kubammeli bomyeni kaNkk DubeNcube, ithi mangingabe ngisaqhubeka nesigcawu leso ngoba ikilayenti labo leli selaphuma kwithenda yokwakhiwa komgwaqo.
"Amakhansela e-ANC kuthiwa abengasalubhadi emhlanganweni obekwenza kube lukhuni ukuba umasipala uthathe izinqumo eziya phambili.
"Sifisa sengathi lo ozothatha lesi sikhundla angaqala phansi aphenye yonke inkohlakalo ebiyenzeka kulo masipala, bese labo ababandakanyeka enkohlakalweni, bathathelwe izinyathelo zomthetho,” kusho uMnu Mncwango.
Okhulumela umnyango, uMnu Lennox Mabaso, uthe okwamanje abakalikhiphi igama lomlawuli nethimba azobe esebenzisana nalo ngoba ngeke ahambe yedwa, kuzobe kukhona abazobhekelela uphenyo nophiko l wa kwanda bazabantu.
“Igama lomlawuli nethimba azosebenza nalo, singaze silikhiphe ngeSonto elizayo,” kusho uMnu Mabaso.
Kwenzeka lokhu eMgungundlovu nje, iMeya yaseGoli uMnu Herman Mashaba, ephethe ngethikithi leDA, isimanaphanapha ngenxa yombhikisho wabantu base-Alexandra abakhala ngezinkinga okubalwa kuzona ukugxunyekwa kwemijondolo ngokungemthetho.
UMnu Mashaba usole i-ANC eGauteng ngokuhlohla abantu ukuze kubukeke kabi iqembu lakhe njengoba naseGoli edolobheni, isimo kuthiwa sifana nse naseMgungundlovu, udoti udlala amagundane emgwaqweni. Bheka nasekhasini 20.