UZOFIHLWA KUSASA UZULU
UZOKHUNJULWA ngokuthanda ukuzivocavoca uSenzeni Zulu (93) ( osesithombeni), waKwaMashu, owayeyisitobha seDurban Bush Bucks, oshone ngoMgqibelo emuva kokuxineka njengoba ngoNdasa (March) eshiswe ngamanzi.
UNkk Zandile Nkopane, uMaZulu, oyindodakazi yakhe, utshele ILANGA izolo ngoLwesithathu ukuthi leli qhawe lizobekwa endlini yalo yokugcina emathuneni aKwaMashu kusasa ngoLwesihlanu emuva kwenkonzo ezokuba seNkanyisweni Hall khona, KwaMashu, kusuka ngo-09h00.
Uthi uyohlala ezibonga iziyalo zikayise akholwa wukuthi zimkhulise kakhulu, kwazise ubengezwani nokubhema notshwala.
Utshele leli phephandaba ukuthi uyise ubekwazisa ukujima, yingakho bekungathusi ukuthi uma eyohola imali yempesheni azihambele ngezinyawo yize ebesekhule kangaka. Uthi uyise ubengezwani nento ebhedayo, ekwazisa ukudla okunomsoco.
Okunye athi bekwethusa ngaye, wukuthi kayikho into eyenzeka kulo mhlaba abengayazi nakuba iminyaka ibisihambile.
UVuma Mfeka, okhulumela abadlali abadala, uthi yize uZulu wadlala ngezikhathi ezingaphambili kunaye, kodwa umlando wakhe kawusoze waphela. Uthi waba yisitobha sokuqala KwaZulu-Natal (okwakuyiNatal ngaleso sikhathi) ukuba ngumdlali ogijima esigabeni esikhokhelayo.
Uthi uZulu waqala ukudlalela i-Aces United ngaphambi kokujoyina iBush Bucks FC okungamakilabhu aseMsizini ayegijima kwiDurban and District (D&D). Ngemuva kweminyaka embalwa, uxebuke kwiBush Bucks wangena kwiCarlton Bush Bucks kaRev Charlton eminyakeni ye-60’s.
Udlale kuleli noDarius Dhlomo, uShordex Zuma, uSuper “SoMnas” Mthiyane, uSolo Buthelezi, bephethwe nguJackson Ngidi. Ushiye emhlabeni indodakazi, uNkk Nkopane, nabazukulu abathathu.