"BABANJISWE ISISILA SEHOBHE"
IKHALA ngoMnyango wezoLimo KwaZulu-Natal inhlangano yabalimi basoNdini, iBabanango Ilima Farming Co-operative, ethi ithenjiswe uxhaso luka-R1.5 million yilo mnyango ngo-2017 kodwa namanje kusacwebe iziziba.
UMnu uThulani Zungu, ongusihlalo wale nhlangano eyakhiwe ngabesifazane abane nabesilisa ababili, utshele ILANGA ukuthi sekuyisikhathi eside bathenjiswa wumnyango le mali ukuze babiyele amasimu, bawalime, bawathuthukise abe sesimeni. Kulo nyaka uthi batshelwe ukuthi le mali isizoncishiswa ibe wu-R500 000 kodwa nakhona bazoze bayithole ngonyaka-mali ozoqala.
“Kufike uNgqongqoshe (Themba) Mthembu ehamba nobuholi besifunda iZululand bezobona le nhlangano yethu la isebenzela khona, sathenjiswa le mali okumanje asikayitholi. Okusiphatha kabi wukuthi ezinye izinhlangano ziyaqhubeka nokusebenza, eyethu imile, kasazi kwenzenjani,” kusho uMnu Zungu.
Le nhlangano ilima ukudla okubalwa kukho amaklabishi, i- spinach namazambane kanti kuyimanje iqashe intsha ewu-25 ehola u-R1 700 umuntu ngamunye.
Okhulumela uMnyango wezoLimo nokuThuthukiswa kweziNdawo zasemaKhaya KwaZuluNatal, uNkk uPhathisa Mfuyo, uthe umnyango uyalwazi lolu daba nezingqinamba ezibhekene nale nhlangano.
“Lolu daba luyasetshenzwa yinhloko yomnyango esifundazweni, nenhloko yomnyango esifundeni iyaxhumana nosihlalo wenhlangano. Umchazele ukuthi le nhlangano isibekelwe imali yokuyilekelela ngonyaka-mali ozoqala ka-2019/20.
“UNgqongqoshe Mthembu uyile kule nhlangano ngonyaka odlule mhla ka-29 kuLwezi (November) 2018 waveza ukuthi lukhona uxhaso ezoluthola emnyangweni. Ihhovisi lethu lesifunda lizamile ukulekelela le nhlangano ngokuyinika izinto zokutshala ummbila nobhontshisi, yazenqaba ngoba ikhala ngokuthi indawo elima kuyo kayibiyiwe,” kusho uNkk uMfuyo.