Uyaziqhelelanisa nokushiswa kwencwadi
Lolu daba lunyakazise nabahleli
UPHUMELE obala izolo ngoLwesithathu waziqhelelanisa nomkhankaso wokuba kushiswe incwadi ekhuluma ngamahlazo okuthiwa uwenzile uNobhala-jikelele weANC, uMnu Ace Magashule ( osesithombeni).
Le ncwadi ethi‚“Gangster State: Unravelling Ace Magashule’s Web of Capture” elotshwe wuqweqwe lwentatheli, uPieter-Louis Myburgh, iveza ukuthi uMnu Magashule ubengungqondongqondo wokuthunjwa kombuso ( state capture).
NgoLwesibili ebusuku kusuke esinamathambo kwesinye sezitolo eSandton City, eGoli, lapho beyethulwa khona ngokusemthethweni, kugasela amalungu e-ANC ephazamisa umcimbi.
Kulandele inkulumo yokhu
lumela i-ANC Youth League eFree State - lapho uMnu Magashule ayengundunankulu khona - okusolwa ukuthi imikhuba eminingi uyigile khona, uMnu Sello Pietersen, othe kuzomele izincwadi zishiswe ngoMsombuluko.
Le ncwadi imkhiphela eshashalazini uMnu Magashule njengongqondongqondo wohlelo olucatshangwe kahle lokuthunjwa kombuso eFree State iminyaka esondele kwewu-10.
Kuzokhumbuleka ukuthi uMnu Magashule uphumela obala nje, nayo i-ANC, ngomkhulumeli wayo obambile, uMnu Dakota Legoete, ibisizwakalisile ngoLwesibili ukuthi kayihambisani nokuthikanyezwa komcimbi wokwethulwa kwayo.
Amazwi akhe afe namthanyana njengoba ngesikhathi somcimbi kutheleke kuwo isigejane sabalandeli bakaMnu Magashule, bawuphazamisa.
Lokhu kuholele ekutheni ukuxoxa ngayo kungabe kusenzeka kulo mcimbi obusingethwe nguMhleli wephephandaba iCity Press, uMnu Mondli Makhanya.
Le ndaba isinyakazise ngisho neThe South African Editors’ Forum (Sanef) esihlabe yasihlikiza isenzo sababhikishi abatheleke bephethe izingqwembe besho isiqubulo esithi, “Ace!”
Kuthiwa ababhikishi badabule ezinye izincwadi basakaza amakhasi azo. Lolu hlaka lubhale kwiTwitter lwathi ukucindezelwa kwelungelo lokukhuluma ngenkululeko akunayo indawo ngaphansi kombuso wentando yeningi futhi yakushayela ihlombe ukugxekwa kwalesi senzo yi-ANC.
NoSotswebhu we-ANC ePhalamende, uMnu Jackson Mthembu usihlabe wasihlikiza isenzo samalungu e-ANC angabalandeli bakaMnu Magashule wathi uzonxenxa i-ANC ukuba iwathathele izinyathelo.
Amalungu e-ANC enza lokhu nje, kakukapheli zinsuku ezingaki kubonakale awe-EFF ejikijelana nabanye abantu ngezihlalo eHout Bay, eWestern Cape, ngesikhathi kunenkulumo-mpikiswano ngokhetho.