UDUMI UNESIFISO SOKUVULA ISIKOLE SOKUCIJA ABADWEBI
UFISA ukukhula aze abe nesikole sokucija amaciko asakhula, umdwebi osemncane waseSikhaleni, eMpangeni, ogila izimanga esebenzisa ipeni lika- ink, enza imidwebo ebizwa nge- fine art.
UDumisani “Dumi” Cele (21), owenza izifundo zeTourism Management, e-University of KwaZulu-Natal (UKZN), uthi ukhule ekuthanda ukudweba, kodwa uqale ukugxila kukhona ngonyaka odlule ukuze athole isinkwa njengoba esafunda.
Uthi yize engakayenzi imali etheni ngethalente lakhe, kodwa uyelapheka uma edweba.
“Kayikho imali kangako uma ungumdwebi osafufusa ngoba lo mkhakha kawunakekile. "Abanye bakuthatha sengathi uchitha isizungu nje uma udweba, kanti kukhona abaziphilisa ngakho. Ngaphandle kwalokho, kuyayipholisa ingqondo,” kusho yena. Uthi ukhethe ukugxila kwiballpoint paint (okuyimidwebo yepeni) ngenxa yokuthi kulula ukuthola ipeni kwazise kalibizi kakhulu futhi wonga kakhulu kwazise usengumfundi. Ugqugquzele intsha enamathalente ukuba ingawabukeli phansi amathalente ayo. “Ngizimisele ngokudlondlobala ngemidwebo yami ngize ngifinyelele ezingeni lokuba nesikole lapho ngizocija khona amaciko asakhula,” kusho yena. Uthi akaboni ukuthi kungani abantu bengayithakaseli imidwebo kaLebani “Rasta” Sirenje wodumo lwemidwebo ewuphawu lokuhlonipha osaziwayo abasuke beshonile, kwazise naye yindlela asuke echaza ngayo noma ebona ngayo lowo muntu noma lokho asuke ekudweba. Imidwebo kaDumi igcwele ezinkundleni zokuxhumana lapho athi uyifaka khona ngoba enzela ukuba ibonwe ngabantu abafisa ukuba ngamakhasimende akhe. Uthi lokhu kumsize kakhulu ngoba uyawathola amakhasimende.