IMEYA IFEZE IZIDINGO ZOSOMABHIZINISI
IQEDE ukudideka nezikhalo iMeya yaseBig 5 Hlabisa, uMnu Velenkosini Hlabisa, ngesikhathi kukhona abantu abebekhononda ngesikhathi yethula izinhlelo zentuthuko edidiyelwe, ePetros Mtshali Community Hall, KwaNibela, eHluhluwe ngeledlule.
UMnu Hlabisa ubethula uhlelo lwentuthuko edidiyelwe oluhambisana nesabelomali sika-2018/2019. Kube nabantu abakhonondayo bethi imeya ihambisa intuthuko ngoba nakhu sekusondele ukhetho lukazwelonke olungomhla ka-8 kuNhlaba (May).
“Intuthuko njengomkhandlu sizoyiletha emphakathini wakithi, kukhona ukhetho noma lungekho. Laba abathi senza ngenxa yokhetho, kumele bakuqonde ukusebenza komkhandlu.
"Thina silawulwa wumthetho owengamele omasipala, othi kumele senze izethulo njalo onyakeni wemali ngoNdasa (March) kuya kuMbasa (April),” kusho uMnu Hlabisa.
Uveze ukuthi basezinhlelweni zokuyisa emphakathini intuthuko ehlukene, ezodla u-R21 million ezintweni ezicelwe wumphakathi wasemawadini ahlukene. Kuqhilike izihlathi ngesikhathi imeya imemezela ukuthi kunemizi eyasala eMadolweni naseQomukuphila ezofakelwa ugesi.
Abantu bakule ndawo bese benexhala lokuthi bona bashiywe ngaphandle. “Kuno-R165 million wokwakha izindlu eziwu-1667, kuyaziwa ukuthi iBig 5 Hlabisa ihamba phambili ekwakheleni abantu izindlu KwaZulu-Natal.
"Sisaqhubeka lapho-ke. Intuthuko yiyona esiyaziyo esingafuniseli ngayo. Umphakathi mawusethembe ukuthi intuthuko sizoyiletha njengoba uyicelile,” kusho uMnu Hlabisa. Uqinisekise umphakathi ukuthi ezinyangeni ezintathu ezizayo, uzobe usunebhange lakwaCapitec edolobheni laKwaHlabisa.
Lokhu uthe kuzosiza umphakathi obuhamba amabanga amade uyofuna ibhange eMtutabatuba ngenxa yokuthi belingekho kuleli dolobha.
Imeya ibigxile ezintweni ezazicelwe wumphakathi ngonyaka wezimali ophelile, kodwa ebezenziwa kulo nyaka. Iphinde yabheka imisebenzi eyenziwe wumasipala wayo ngempumelelo nesalile ngenxa yokushoda kwemali.
Umphakathi uthole ithuba lokufaka izicelo zentuthuko oyidingayo esabelweni sonyaka wezimali ka-2019/2020.
Phakathi kwezinto ozicelile, wukulungiselwa isakhiwo esingaphandle kwehholo obekuhlanganelwe kulona, yinkulisa, imigwaqo engenela emakhaya - okugcina kungasahambeki kuyo - yizinhlelo zabadala, abakhubazekile nezentsha.
Imeya ishiye kuvela elomhlathi kosomabhizinisi abancane ibagixabeza ngezinsiza-kusebenza abebezicele kumasipala ngaphansi kohlelo olubizwa ngeLocal Economic Development (LED) Projects.
Labo somabhizinisi bebevela ku- ward 1,2, 3, 4, no-5 emawadini awu-13 akhele lo masipala. Lezi zinsiza ziqale zethulwa kuwona la mawadi akhele iKwaHlabisa naseMdletsheni. Izinsiza abazitholile kunemishini yokuthunga, amatende, yizitulo, izitofu nokunye.