Kuzosizwa ama-NPO ukubhekana nezinkinga
Kuzofundiswa nezisebenzi ukuwuqonda umsebenzi wazo
UMnyango wezokuThuthukiswa koMphakathi KwaZulu-Natal, ukubeke emahlombe awo ukunqanda izinkinga ezikhungethe izinhlangano ezingenzi nzuzo (Non-Profit Organisations - NPO) ezixhaswe wuhulumeni njengoba kuvame ukuxabana kwamalungu azo ngenxa yokusetshenziswa budlabha kwemali engabe ibhekela izidingo zazo.
NgoLwesibili eMlazi Cinema, lo mnyango oholwa nguNkk Weziwe Thusi ongungqongqoshe, wethule ubuholi obusha beNPO Forum, esebenza ukuxazulula izinkinga zalezi zinhlangano. Lolu hlaka luqale ukusebenza ngo-2014 ngobuholi osebubeke phansi izintambo.
Echaza ngokusungulwa kwalolu hlaka uNkk Thusi, uthe izinhlangano ezingenzi nzuzo bezingena usuku nosuku emnyangweni wakhe ziyocebana noma zikhala ngokuthile obekugcina sekuphazamisa umsebenzi eziwuxhaselwe.
Ngaleso sizathu uthi babone kunesidingo sokusungula iNPO
Forum emelwe ngamalungu aqhamuka kuzona zonke izifunda, azozazi izinkinga ezibhekene nezinhlangano zangakubo. “Sihlala phansi nayo i- forum sizibuke lezi zinkinga izinhlangano ezisuke zifika nazo, sizame ukuzixazulula.
"Lokhu kwehlisa umthwalo emahlombe ethu, kuphinde kusilekelele uma kunolwazi okufanele siludlulise kuma-NPO njengoba bekuba nzima ukuxhumana nawo ngayinye njengoba ewu-3 267 esiwaxhasile, ethola u-R9 559 million kwisabelomali somnyango,” kusho uNkk Thusi.
Usihlalo omusha wale NPO Forum, nguMnu Solomon Gumede ozosebenza ngokubambisana nongqqongqoshe namanye amalungu esigungu.
Phakathi kwezinselelo lolu hlaka ungqongqoshe athi kufanele lubhekane nazo ngokushesha, wukufundiswa kwezisebenzi zasezinkulisa abona sengathi ziyehluleka wukuqonda umsebenzi womnyango nowezinkulisa lezo ezisuke ziziqashile.
“Sike sabona lezi zisebenzi zigcwele amahhovisi omnyango wethu, zitoyitoya, zibeka umnyango kabi kwabezindaba, engicabanga ukuthi kufanele zifundiswe ukuthi umnyango nabanikazi bama-NPO, yizinto ezehlukene futhi nendlela ezenza ngayo ihlukene.
"Uma isisebenzi singaholelwe, kufanele sibhekane nalona osiqashile, okungumphathi wenkulisa, hhayi umnyango,” kusho yena.
UMnu Sibusiso Xaba ongumnikazi weMpumelelo for Disabled Rural Community Project - okuyinhlangano engenzi nzuzo ezinze eNanda, esiza abakhubazekile ngamakhono okubalwa amakhompyutha, ukulima nokunye, uthe ukuba khona kwalolu hlaka, kubasize kakhulu ngoba sebeyakwazi ukusizana ngolwazi bebodwa bengama-NPO.
“Phambilini umuntu ubezisebenzela ekhosombeni lakhe ngayedwa, kodwa manje sesiyakwazi ukucobelelana ngolwazi,” kusho uMnu Xaba.
UMnu Gumede uthe ukholwa wukuthi bazokwazi ukusebenza nawo wonke ama-NPO akhona ngoba okubaluleke kakhulu kubona ngamalungu omphakathi asizwa yilezi zinhlangano.