Umdanso umvulele iminyango uSlenda
Iqembu lakhe liqokwe kumaGqom Awards
UMDANSO ungomunye wemisebenzi enganakekile futhi abanye abangazitsheli ukuthi ungaphilisa umuntu. USthabile “Slenda” Zungu waseLamontville (24) eThekwini, ongumndansi wase-Afrotainment okuyinkampani kaMthokozisi “DJ Tira” Khathi uthi yena ngomdanso usekwazi nokuxosha ikati eziko. Le ntokazi epilingana sengathi ayinamathambo uma isidansa, ithi manje sekuyisikhathi sokuba abantu bawuhloniphe umsebenzi - wabadansi. Uthi manje akusafani nakuqala lapho umuntu wayedansela amahhala. Egxoxweni abe nayo neLANGA uthi amathuba okukhula akhona emdansweni kanti uthi kuningi asekuzuzile ngokwenza lo msebenzi. Uthi ukuba ngumdansi akugcini nje ngokumgqamisa esiteji ngemidanso asuke eyenza kodwa kumvulela namathuba
futhi sekumakhele negama.
Njengamanje usekwaze ukuvula inkampani yakhe iLavition Modelling Agency, enezintokazi ezibonakala kuma video omculo, iphinde isebenze noku- promoter imikhiqizo ethile.
ILavition isike yasebenza neUniversal Music, ngesikhathi kuqoshwa i- video kaVenessa Mdee. BEBENGAYIZWA EYOMDANSO ABAZALI
Uma echaza ngohambo lwakhe uthi unina ubengayizwa kahle indaba yobumnandi kodwa wahlala naye phansi wambonisa baze bavumelana.
Uqale edansa noBongekile “Babes Wodumo” Simelane. Ube esebonwa nguTipcee, wamthatha beyiqembu nabangani bakhe wabayisa e-Afrotainment, uDJ Tira wabathanda ngenxa yokuzimisela kwabo.
Njengamanje yena neqembu adansa nalo elibizwa ngokuthi “Amadada” liqokiwe kumaGqom’ Awards nakwiCreative Awards. Weluleke intsha ngokuthi njengoba kubhekwene nesimo sokuntuleka kwemisebenzi umuntu kumele asebenzise ikhono lakhe, kube yilo elizomphilisa.
USthabile ufunde eBantu Vukani Secondary, waqeda ibanga leshumi e-A.J Mwelase High khona eLamontville ngo-2013. Akabange esadlulela emazingeni emfundo ephakeme njengoba esaqongelela imali.