Kuyihlazo okwenzeka kuMasipala uMsunduzi
KUYIHLAZO elifikisela ngamahloni ukuthi izikhawu ezimbili, ingakapheli ngisho iminyaka ewu-10, uHulumeni waKwaZuluNatal usuphoqeleke ukuba ubuye ungenelele, uqoke umlawuli ( administrator) ukuba engamele ukuphathwa kukaMasipala waseMsunduzi ngenxa yokwehlulwa wukufeza izidingo zomphakathi kwalo mkhandlu olawulwa yi-ANC.
Okwenza kufikisele ngamahloni ngokuphindiwe, wukuthi lo mkhandlu wengamele inhlokodolobha yeKwaZulu-Natal, iPietermaritzburg, okuyilapho undunankulu wesifundazwe, ongqongqoshe, isishayamthetho nezikhulu zikahulumeni zisebenzela khona. Lo masipala kufanele ngabe uyisibonelo esihle kubo bonke omasipala besifundazwe, kodwa kunalokho uyihlazo.
Amakhansela nezikhulu zawo sebehluleke bancama ukuphatha ngendlela leli dolobha, osekuphoqe ukuba ungqongqoshe ophethe umnyango wezomasipala kuhulumeni wesifundazwe, uNkk Nomusa Dube-Ncube, agcine enze isinqumo esisekwe yikhabhinethi yesifundazwe sokuba lo masipala ungene ngaphansi kwesandla somlawuli, osebekwe ukuba alungise okonakele.
Kuningi okonakele kulo masipala njengoba wehlulwa ngisho wukwenza imisebenzi elula njengokuthutha udoti edolobheni nasezindaweni ezingaphansi kwawo. Wehlulwa ngisho wukuthumela izincwadi zezikweletu ( bills) eziqagula ukuthi umphakathi walapha uwukweleta malini umasipala.
Empeleni ukuba kuneqiniso emhlabeni, akudlalwa ipolitiki, ngabe kade lo masipala wahlakazwa, wafakwa ngaphansi komlawuli. Noma isimemezelo sikangqongqoshe semukeleka, okuxakayo wukuthi akawuhlakazanga umkhandlu, amakhansela aphelelwa wumsebenzi. Bekungaba kuhle ukuba uthathe lesi sinyathelo ukuze kube nokhetho, kuqokwe abantu abazimisele ngokusebenzela umphakathi, hhayi nje ukuziholela imali yabakhokhi bentela kuphela.
Ukungahlakazwa kwalo mkhandlu kuyishwa ngoba kusho ukuthi la makhansela ehluleka wukwenza umsebenzi aqokelwa wona, azoqhubeka ezikhundleni. Nezikhulu eziphezulu zalo masipala, ezihola izigidi zamarandi ngonyaka, zisazoqhubeka ziqhoqhobale izikhundla naphezu kokwehluleka ukwenza umsebenzi ezaqashelwa wona.
Lokhu kulihlazo kepha kakumangalisi ngoba phela emazingeni kahulumeni, izikhulu eziphezulu zivame ukuqashwa ngokobuqembu, okudala ukuba noma ngabe zehlulwa wumsebenzi, kodwa zifukanyelwe yiqembu elibusayo.
Obekufanele kwenzeke kulesi simo wukuhlakazwa komkhandlu yikhona kuzoba nokhetho olusha lokuchibiyela, abavoti bathole elinye ithuba lokuqoka umkhandlu kabusha. Sethemba ukuthi umlawuli ozoqokwa ngumuntu onekhono nemfundo yokulawula ngendlela eyiyo, nokuthi uzothatha izinyathelo ezinqala zokukhuculula inkohlakalo, wukuphatha budlabha nokwebiwa kwemali yabakhokhi bentela kulo mkhandlu.
Izakhamizi zalo masipala zifanelwe impilo engcono, kunalokhu esezikujwayele kule ndawo.