Inkinga yothisha abaphuthayo emsebenzini
Ucwaningo luveze izinselelo eziphazamisayo
UBHEKENE nengwadla uMnyango wezeMfundo eyisiSekelo ngenxa yokwenyuka kwezinga lokuphutha kothisha emsebenzini ngezizathu ezahlukene.
Lokhu kuvele embikweni kaNgqongqoshe Angie Motshekga awethule ngoMsombuluko wokuhlola ( survey) obekwenziwa ngonyaka ka-2017, lapho kuvele khona ukuthi lilinganiselwa ku-10% manje izinga lokuphutha kothisha emsebenzini lisuka ku-8% waphambilini.
Inkinga yokuphutha kothisha ngenye yezinselelo umnyango obhekene nazo, ezivezwe yilolu phenyo: njengezikhala zothisha ezingagcwalisiwe, inkinga yokuntuleka kwezincwadi nemitapo yolwazi ( libraries), ukusebenza kwezigungu ezengamele izikole, wukuhlola ezingeni likazwelonke, nayo-ke indaba yokuphutha kothisha.
“Lokhu kuyakhathaza kakhulu. Kumele kwenezelwe ukuxhaswa kothisha bethu. Kunesidingo sokuba kugxilwe emininingwaneni yezinombolo ukuze iqondwe le ngwadla yokungafiki emsebenzini,” kusho uNkk Motshekga.
Ngokohlu olukhishiwe kulo mbiko, isifundazwe iNorthern Cape yisona esiziholayo ngale nkinga ezikoleni zamabanga aphansi njengoba khona ilinganiselwa ku-16%, kulandele iNorth West ngo-13,9%, kube yiEastern Cape ngo-13,2%, kuze iGauteng ngo-11,1%, iWestern Cape ngo-10,1%, iMpumalanga ngo-9,5% yiKwaZulu Natal ngo8,3%, yiFree State ngo-7,6% kugcine iLimpopo ngo-6,9%.
Ezikoleni zamabanga aphakeme inkinga isingenhla kwamadolo njengoba ngesikhathi kuhlolwa, kutholakale ukuthi isimo sezinga lokuphutha siveza i-Eastern Cape kuyiyo eziholayo ngo-19,5%, iNorthern Cape ngo18%, iWestern Cape ngo-16,9%, iGauteng ngo-16,8%, yiNorth West ngo-15,3%, yi-Free State ngo-14%, yiKwaZulu-Natal ngo13,3% yiMpumalanga ngo-13,1% neLimpopo ngo-11,8%.
Ethintwa yiLANGA uNobhala weSadtu KwaZulu-Natal, uNkz Nomarashiya Caluza, uhambe emagameni kaNgqongqoshe Motshekga, othe othisha badinga ukwesekwa kakhulu ngoba base
benza ngaphansi kwezimo ezibanga ingcindezi. Wenze isibonelo ngodaba olusanda kuvela emaphephandabeni lweCarrington Primary School, eThekwini, lapho othisha besifazane bebekhala ngokuhlukunyezwa kodwa umnyango uhudule izinyawo.
Ngaphandle kwalokho, uthe ngisho abantwana bezikole zemfundo yamabanga aphansi kabasalawuleki ngoba bayazi ukuthi othisha ngeke babenze lutho, kodwa bayogcina ngokukhuluma kuphela, ingasaphathwa-ke eyezikole zamabanga aphezulu ngoba abafundi balapho bayabahlasela othisha.
UMengameli weNatu, uMnu Allen Thompson, yena uthe kabakweseki ukungayi kothisha ezikoleni. Uqhube wathi nokho othisha nabo bayaba nezimo ezibadingayo njengokuhambela imihlangano yabazali lapho kufunda khona ezabo izingane, noma ukubheka izimo lapho izingane zabo zigula zidinga ukuyiswa kodokotela.
Ngaphandle kwalokho, uMnu Thompson ubuye wakhala ngalokho okwaziwa nge- teacherpupil ratio lapho isibalo sabafundi kuthisha ngamunye siphezulu kakhulu, okwenza othisha