Abasubathi abanohlonze kowaseNquthu
Umnyango uhlose ukusabalalisa imidlalo ezindaweni zasemakhaya
UYAQHUBEKA nokusabalalisa ezemidlalo KwaZulu-Natal uMnyango WezeMidlalo wesifundazwe njengoba uhlela iNquthu Half Marathon ehambisana ne-10km ezokuba ngeSonto kusuka ngo-6 ekuseni.
Lo mjaho ngowesibili esifundazweni ohlelwe wumnyango njengoba ekuqaleni konyaka ubuhlele iWillies Mchunu Legacy Half Marathon eMtshezi. Lo mjaho waseNquthu uqale nyakenye uyi10km njengoba nonyaka usuhlanganise ne-Half Marathon.
Umnyango uthi inhloso yawo enkulu wukusabalalisa ezemidlalo ezindaweni zasemakhaya kwazise miningi imijaho efuze lena emadolobheni. Kulo mjaho kulindeleke abasubathi abahlonishwayo esifundazweni. Phakathi kwabo kukhona uJenet Mbhele osematheni kulezi zinsuku kulandela ukungabi yingxenye ye-International Association of Athletics Federation (IAAF) World Cross Championships ebiseDenmark ngeledlule, uMbuleli Mathanga osefomini enhle kulezi zinsuku ukubala nje ababili.
Ibanga lika-10km lisukela eZiqhazeni kuthi i-21km isukele eRorke’s Drift kanti yonke le mijaho izophelela ezinkundleni zemidlalo zakuyo le ndawo. Izingqwele zalo mjaho zizohlomula ngo-R10 000 kwi-21km kuze kufike kwabazongena endaweni yeshumi bese kuthi kwi-10km bahlomule ngo-R5 000.
UThabo Mofokeng okhulumela uMnyango WezeMidlalo, uthe imingenelo yalo mjaho iyatholakala kwiWebticket etholakala ezitolo zakwaPick n Pay kulo lonke elakuleli.
“Inhloso yomnyango wukusabalalisa ezemidlalo kuso sonke isifundazwe. Sinawo umjaho eMtshezi nalo waseNquthu kanti sisazohlonza ezinye izindawo lapho sizokuba nemidlalo efuze lena. Abasubathi abaningi bayaye bakhokhe eningi imali uma beya kogijima ngakho-ke sithe asibalethele lapho behlala khona,” kusho uMofokeng.
Bayacelwa abasubathi abaphuma ngaphandle kwelakuleli ukuba baphathe izincwadi ezibagunyazayo ukuba bazogijima kuleli.
Abafuna ulwazi ngalo mjaho bangaxhumana noKeneth Shange kwethi: 073 397 9358 noma uSamu Ntshangase kwethi: 072 290 4063.
I-Athletics South Africa (ASA) iqoke ukhilimu wesikwati esizomela elakuleli kwi-2019 CAA African Youth and Junior Championships ezoqala ngoLwesibili e-Abijan, e-Ivory Coast.
Abasubathi abazomela iNingizimu Afrika baqokwe kwiTwizza ASA Youth and Junior Track & Field ebingeledlule ePaarl. Kulesi sikwati babili abasubathi abaphuma KwaZulu-Natal, ngu-Amy Naude obuye negolide kwi-400m noKirsten Ahrens ongene isibili kulo leli banga.
Selilonke iqembu lamajuniya lididiyelwe kanje: UThabang Hlohlolo, u-Eckardt Potgieter, uMiandi van Staden, uNosipho Malinga, uSinesipho Dambile, u-Elke van der Westhuizen, uLene van Heerden, uLythe Pillay, u-Antonie Nortje, u-Amy Naude, uPrudence Sekgodso, uTebogo Sekgodiso, uCarmie Prinsloo, uReinhardt Strauss, uKayla van den Bergh, uLuciano Custodio, uJeanne Visser, uKyle Rademeyer, uNikolai van Huysteen, uJason Tito, uJoane Gerber, uNolwazi Mashaba, uDouw Kruger, uWynand Swanepoel, uDane Roets, uMine de Klerk, uWynand Swanepoel, uPhethisang Makhethe, uHeike De Nysschen, uVuyo Ndlovu, uJesse Josias, uCharlize Eilerd, u-Odette van Wyk, uLythe Pillay, u-Antonie Nortje, u-Adrian Swart, uRyan Jordan no-Angelique Strijdom
Elamajuniya: uPhatutshedzo Maswanganyi, uLuke Davids, uRose Xeyi, uRemoneilwe Pasha, u-Antoinette Van der Merwe, uFrans Matlala, uNhlanhla Maseko, uKirsten Ahrens, uMarli Viljoen, uMichael Schoeman, uZazini Sokwakhana, uRogail Joseph, uGontse Morake, uBreyton Poole, uKristi Snyman, uValco van Wyk, uTristan Faro, uSifiso Miya, uChris Van Niekerk, uMeike Strydom, uFrancois Prinsloo, uChris van Niekerk, uSavanah Combrink, uBotshello Kobokoane, uTharina Van Der Walt, uRogail Joseph, uFrans Matlala, noDavid Seete.