UTHEMBE UMLANDO UMQEQESHI WE-KINGS
UMQEQESHI weReal Kings uSimo “Govuza” Dladla uthembe umlando ukuthi yiwona ozobasiza ukuze behlule iJomo Cosmos abazobhekana nayo koweNational First Division (NFD) ngoMgqibelo ngo15h00 eKing Zwelithini Stadium, eMlazi.
IKings iya kulo mdlalo nje, ibuyelwe yithemba lokuvika izembe emuva kokuba ibhuquzise ngo2-0 ovuthayo omkhaya bayo iRichards Bay FC koweligi ngeledlule eMhlathuze Sports Complex, eRichards Bay.
UDladla ekhuluma naleli phephandaba, uthe into emnika ithemba lokuthi bazowunqoba lo mdlalo wukuthi iCosmos ayikaze ibanike inkinga uma besekhaya.
“Ngiyazi ukuthi abathandi bebhola bazocabanga ukuthi ngiyibukela phansi iCosmos kanti akunjalo yikhona nje ukuthi umlando uvuna thina ekhaya.
Kuzokuba ngumdlalo onzima futhi omnandi kubalandeli besifundazwe.
Kulo mdlalo sizokuya nesikwata esiphelele asinamdlali olimele.
Empeleni sesilindele umdlalo konke sekumi ngomumo,” kusho uDladla.
Ube esenxusa abalandeli ukuba bangapheli umoya baqhubeke nokweseka le kilabhu.
USiza Dlamini ongumsizi womqeqeshi kwiJomo Cosmos, uthi lo mdlalo uzoba nzima.
Uthi okubamise kabi wukuthi bazoya kulo mdlalo ngaphandle kukaSilas Maziya, u-Onke Moletshe, uMpumelelo Zondi noZuko Gxabuza abayozama inhlanhla kwiGremio Esportivo Mauaense, yaseBrazil.
Kuzo eze-NFD iWitbank Spurs igcine iqashe uKagiso Dikgacoi njengomqeqeshi omusha.
Isiyonke imidlalo yeNFD engempelasonto ihlelwe kanje:NGOMGQIBELO Athlone Stadium: UBuntu Cape Town vs Richards Bay FC 15:00.
EPuma Stadium: Witbank Spurs vs Mbombela United 15h00. Kabokweni Stadium: TS Sporting vs Pretoria University FC 15h00.
EKing Zwelithini Stadium: Real Kings vs Jomo Cosmos 15h00.
E-Idas Valley Sports: Stellenbosch FC vs UThongathi FC 15h00. NGESONTO ECape Town: Ajax Cape Town vs Cape Umoya United 15h00.
EVolkswagen Dobsonville: Maccabi FC vs Tshakhuma FC 15h00.
EKameelrivier: TS Galaxy vs Royal Eagles 15h00.