ISENGCUPHENI YOKUGENGCWA YIZEMBE I-MARITZBURG CITY
ISENGCUPHENI yokugengcwa yizembe iMaritzburg City osekuneminyaka igijima kwiSouth African Football Association KwaZulu Natal ABC Motsepe League.
ICity izobhekana neMilford koweligi ngoMgqibelo ngo-15h00 eMhlathuze Sports Complex, eRichards Bay.
Le kilabhu ephethwe nguBongi Hlophe, isendaweni yesithathu uma usuka emsileni we- log ngamaphuzu angu-27 emidlalweni engu27.
Njengoba iyogijima umdlalo wayo wokugcina weligi nje kufanele noma kanjani iwunqobe ukuze isinde ezembeni.
NeMilford isenkingeni efanayo njengoba isendaweni yesibili uma usuka emsileni ngamaphuzu angu24 emidlalweni efanayo.
Nayo idinga iwini ukuze izibeke ethubeni lokubalekela izembe.
Nokho uma iKings igengcwa yizembe kwiNational First Division (NFD) neSummerfield Dynamos eyizingqwele zeKZN Motsepe League ihluleka wukunyukela kwiNFD, izembe lizogengca amakilabhu amathathu kwiMo-tsepe League.
Enye ikilabhu okubukeka seliyishonele yi-Ashley United ezinze KwaNdengezi esanda kuthengwa nguVusi Mthembu.
I-Ashley izobhekana neHappy Wanderers kowokusonga iligi ngoMgqibelo ngo-15h00 eSouth Coast Academy, ePort Shepstone.
I-Ashley ibambe ibhuleki kwilog ngamaphuzu angu-24 emidlalweni engu-27.
Amakilabhu asezibekele indawo kuma- play off azokuba seCape Town ngoNhlangulana (June) yiAcornbush United yaseMpumalanga, yiMangaung United yaseFree State neSummerfield Dynamos yaseKZN.
Kwezinye izifundazwe isaqhubeka imidlalo.
Isiyonke imidlalo yeSafa KZN ABC Motsepe League yokusonga isizini ihlelwe kanje:NGOMGQIBELO ESouth Coast Academy: Happy Wanderers vs Ashley United 15h00.
EPeter Booysens Grounds: Summerfield Dynamos vs X1 Experience 15h00.
EMhlathuze Sports Complex: Milford FC vs Maritzburg City 15h00.