AbaseKZN ethubeni lokulwela izicoco
Iningi lamabhokisa livela eThekwini Boxing Gym
KUWAHAMBELA kahle amabhokisa aKwaZuluNatal njengoba esethubeni lokulwela amabhande kazwelonke maduzane.
Ezilinganisweni zakamuva ezisanda kukhishwa yikomidi elenza ama- ratings eBoxing South Africa, kuvela ukuthi mabili amabhokisa azozithola eselwela izicoco zakuleli.
Okugqamayo wukuthi iningi lalawa mabhokisa ngasesitebeleni i-Ethekwini Boxing Gym eseThekwini kaThulani Magudulela.
Kuno-Ayanda "Nyamazane" Mthembu, okleliswe endaweni yokuqala esigabeni se- middleweight, okukhonya kuyo uWalter "Black Mamba" Dlamini waseGoli.
Ngokomthetho kufanele uDlamini enze i- mandatory defence, okusho ukuthi uphoqelekile ukuba avikele ibhande kuMthembu waseMandeni.
Kuyo i- middleweight kuvela igama likaSinamile Ntuli waseMnambithi okleliswe endaweni yesithathu.
Esigabeni se- junior bantamweight kuvela uThulani "Smith" Gumede, osengene endaweni yesithathu kanti uMnqobi "Isishingishane" Mkhize uhlezi endaweni yesithupha.
Bobabili basanda kushaya into ecokeme emqhudelwaneni
obuseMtubatuba muva nje.
Makhulu amathuba okuthi ingqwele uSabelo Ngebiyane waseEastern Cape, atomule uGumede ukuvikela ibhande lakhe.
Elinye ibhokisa elivelayo kulesi sigaba nguMsawenkosi Ndwandwe waseMandeni ohlezi endaweni yesithupha.
Kwi- welterweight kunoKhumbulani Mdletshe ohlezi endaweni yesihlanu, uSthembiso Maduna okleliswe endaweni yesi-8 kwifeatherweight, uSiboniso Gonya uhlezi endaweni yesikhombisa bese kuthi uTholomuzi Ngwenya ubekwe endaweni yesithupha kwibantamweight.
Umqeqeshi wamabhokisa aseLudonga uZwi Magudulela, uveze ukuthi kuyabajabulisa ukubona umsebenzi wabo wokuzikhandla ukhiqiza izithelo.
"Kuyiphupho lethu eLudonga ukukhiqiza izingqwele. Kuyasijabulisa ukuthi sisebenzisana nabafana abalambele impumelelo. Sithemba ukuthi ukungena kwabo kuma- ratings kuzogqugquzela nabanye abeza emuva kwabo," kusho uMagudulela.
Uzobe engaqali uMagudulela ukukhiqiza izingqwele zikazwelonke. Waqala ngokunqobisa uChristopher Buthelezi ibhande le- middleweight ngo-2010 kwathi ngonyaka olandelayo wenza okufanayo noWiseman "Sabalutho" Dlomo esigabeni se- heavyweight.