Usomabhizinisi uqolwe 'yisalukazi' u-R115 000
Usola ukuthi besihambisana nabalisa abebezenza amaphoyisa
UKHALA uyazithulisa usomabhizinisi waseMtubatuba okusolwa ukuthi “ubanjwe inkunzi” yisalukazi sihlangene nabesilisa abebezenza amaphoyisa ngeledlule, bakhala bemuka no-R115 000 abekade eyowukhipha ebhange elikule ndawo.
UMnu Muziwendoda Mbatha, ongusomabhizinisi osafufusa, uthi namanje akakakholwa ukuthi ihambe yonke le mali ebanjwa emini ilanga libalele ngenxa yomusa, ethi usiza owesifazane osekhulile (isalukazi).
Uthi empeleni uye ebhange eyokhipha u-R118 000, okuyimali abeyigcinile njengoba ezisebenza ngokusikela abantu nezikole utshani. Uveze ukuthi phambilini uye ebhange eyofaka isicelo sokukhipha le mali watshelwa ukuba abuye ngolunye usuku.
“Ngiphindelile ngosuku ebengiyalelwe lona, ngithe ngikulayini ebhange sengizofika phambili, intombazane ebengifake isicelo kuyona phambilini, yaphuma.
"Ngigcine ngifikile phambili komunye okuthe uma ngicela ukuba angisize, wangitshela ukuthi kuzomele ngilinde lona ebengifake kuyena isicelo. Ngilindile waze wabuya, wangilungisela njengoba ngangicelile phambilini.
"Ngigcine ngikhipha u-R115 000 ngawufaka esikhwameni, ngaphuma. Ngenxa yokuthi bengifuna nokuthengela izingane izinto ezincane, ngidlule esitolo ngathenga.
"Ngithe ngisephakathi, kwaqhamuka isalukazi esingicele ukuba ngisilekelele sifuna unemenayithi ongenayo i- acid. Ngisikhombisile sabe sesiyokhokha. Ngithenge konke ebengikufuna ngabe sengiphuma.
"Ngithe sengingaphandle, saqhamuka futhi lesi salukazi sangicela ukuba ngisiyise ngasendlini yangasese ngoba besixinekile.
"Ngisifake emotweni saya ngaserenki yamatekisi lapho kukhona izindlu zangasese. Kube wukufika nje khona, sakhala ngokuthi lezi zindlu zangasese kazisebenzi zingcolile, sacela ukuba ngisiyise endaweni eyifokozi lapho besizozikhulula khona. Ngikwenzile lokho, sangicela ukuba ngingayisusi imoto ngoba sifuna ukucasha ngayo.
"Ngithe ngisamile, kwaqhamuka enye imoto kwehla abesilisa abathathu abazichaze njengamaphoyisa, bangitshela ukuthi ngiyaboshwa ngoba ngisolwa ngokugqekeza imoto ngihamba nalesi salukazi.
"Bangitshele ukuthi banomfanekiso oqoshiwe okhombisa mina ngihamba nalesi salukazi senza lokhu. Bangithathile bangiyalela ukuba ngikhiphe yonke into ebalulekile emotweni yami, yona ngiyishiye, izolandwa ngamanye amaphoyisa,” kusho yena.
Uthi into eyenza asole ukuthi lesi salukazi besiyingxenye yalolu zungu, wukuthi ngesikhathi zimthatha lezi zigebengu, zimbize ngesibongo sakoninalume asitshele lesi salukazi, okwenze wabona ukuthi bezixhumana naso.
“Sigibelile naso emotweni bahamba nami bayongifaka ehlathini, bangikhuthuza khona, bathatha isibhamu sami nayo yonke imali,” kusho yena.
Uthi namanje usaphanjanelwa yingqondo uma ecabanga lesi sigameko ngoba ubesethemba lesi salukazi, ethi usiza umuntu omdala, kanti usezigwaza ngowakhe.
Okhulumela amaphoyisa KwaZulu-Natal, uCapt Nqobile Gwala, uthe likhona icala lokubamba inkunzi kuhlonyiwe kodwa okwamanje bekungakaboshwa muntu. Ube esexwayisa umphakathi ukungayiphathi imali eningi ngesikhathi esisodwa.
Singicele ukuba ngisiyise endlini yangasese.