ABE-THE QUEEN ETHEKWINI
Baqopha iziqephu zalo mdlalo eBallito
UQOPHA ezinye iziqephu zawo eThekwini umdlalo owuchungechunge, iThe Queen, okhonjiswa phakathi nezinsuku kuMzansi Magic ( channel 161) kwiDstv ngo-21h00 kusuka ngoMsombuluko kuya kuLwesihlanu.
Lo mdlalo isizini yawo yesithathu esidumela emasumpeni, uqopha ezinye zeziqephu zawo eFairmont Hotel, eBallito, lapho kuzobonakala khona umndeni wakwaKhoza nowakwaMabuza.
Nakuba engaphumelanga obala ngalezi ziqephu uConnie Ferguson, ongomunye wabasunguli balo mdlalo futhi odlala indawo ephambili kaHarriet “Queen” Khoza kuwona, kodwa ukuvezile ukuthi ezinye zezizathu zokuqophela kuleli dolobha wukuthi banenqwaba yababukeli abangabaKwaZulu-Natal.
“Senzela nababukeli bethu bakwazi ukuthokozela ukubona izindawo abazaziyo ezisondelene nabo,” kusho uConnie.
Uthi akazimisele ukuveza okuningi ngokusazokwenzeka kulo mdlalo, kodwa kusazoshuba, abantu mabalindele okukhulu okuzobenza baqhubeke nokuwuthokozela.
I-The Queen, ingenye yemidlalo ehamba phambili ngababukeli kule channel ekhokhelwayo kanti igabe ngabalingisi abanohlonze.
Phakathi kwabalingisi abazobonakala eziqeshini zaseThekwini kubalwa yena
uConnie, Rami Chuene (Gracious Mabuza), Zenande Mfenyana (Goodness Mabuza), Sthembiso “SK” Khoza (Shaka), Shona Ferguson (Jerry Maake), uZandile Msutwana (Vuyiswa), Dineo Moeketsi (Kea Khoza) noThemba Ndaba (Brutus Khoza).
UNdaba uthe kuyamjabulisa ukuthi baphumele ngaphandle kweGoli njengoba bezoqopha lezi ziqephu kanti naye uthembise ulozolo njengoba enxuse abantu ukuba baqhubeke nokubuka lo mdlalo.
Uveze ukuthi usakuthokozela ukudlala indawo kaBrutus ngoba iyindawo abantu abakwaziyo ukuyiqonda.
“Emindenini eminingi umalume uBrutus ukhona, ngakho abantu bayakwazi ukusondelana naye futhi bamqonde kangcono,” kusho uNdaba ongomunye wabalingisi abamnkantshubomvu kulo mdlalo futhi indawo ayidlalayo ithandwa kakhulu ngababukeli bawo.
I-The Queen inabalingisi asebeke badla umhlanganiso kwiMzansi Viewers Choice Awards njengoba ngo-2017 kuhlabane uNdaba kwathi ngowedlule kwahlabana uThembsie Matu, odlala indawo kaPetronella, ongeke abonakale eziqeshini eziqoshelwa eThekwini. Ibalwa neminye imidlalo ethandwayo evutshelwa yiFergusons Films, okubalwa iThe River neGazi.